Sólveig Jónsdóttir greindist með brjóstakrabbamein í maí síðastliðnum, aðeins nokkrum mánuðum eftir að reglubundin skimun hafði ekki sýnt nein merki um sjúkdóminn. Hún ræddi reynslu sína í tengslum við Bleiku slaufuna og hvetur fólk til að vera vakandi fyrir einkennum, óháð því hvenær það fór síðast í skimun.

Sólveig fór í reglubundna skimun í nóvember 2025 og var niðurstaðan eðlileg. Í febrúar fann hún hins vegar fyrirferð í brjóstinu. Þar sem stutt var liðið frá skimun taldi hún ólíklegt að um krabbamein væri að ræða. Hún stundaði á þessum tíma kraftlyftingar og taldi mögulegt að fyrirferðin tengdist þeim.

Þegar hún minnkaði ekki eða hvarf ákvað Sólveig að leita til læknis í maí. Þá kom í ljós að hún var með brjóstakrabbamein og að meinvörp væru komin í eitla.

Sólveig segir greininguna hafa vakið upp ýmsar sterkar og óvæntar tilfinningar.

„Mér fannst ég vera að bregðast börnunum mínum og nú væri allt einhvern veginn að fara að breytast.“

Hún leitaði meðal annars stuðnings hjá ráðgjafa Krabbameinsfélagsins og áttaði sig þar á að fleiri upplifðu svipaðar tilfinningar. Sólveig leggur áherslu á mikilvægi þess að bregðast við óvenjulegum einkennum og láta skoða þau, jafnvel þótt nýleg skimun hafi ekki sýnt neitt óeðlilegt.