Mikil lögregluaðgerð stóð yfir í Furutorpsparken-garðinum í Helsingborg í Svíþjóð í gær eftir að fimm ára stúlka fannst alvarlega slösuð með stungu- eða skurðáverka á leikvelli.

Samkvæmt sænska miðlinum Aftonbladet var stúlkan stungin með hnífi. Lögreglan hefur staðfest að stúlkan hafi fundist á vettvangi með stungu- eða skurðáverka og verið flutt á sjúkrahús, en vill að svo stöddu ekki staðfesta frekari upplýsingar um árásina eða hvort vopn hafi fundist á vettvangi.

„Við höfum fundið tæknileg sönnunargögn á vettvangi, það er það sem ég get sagt á þessari stundu,“ sagði Christian Magnusson, starfandi yfirlögregluþjónn í Helsingborg.

Heilbrigðisyfirvöld á Skáni greindu frá því að stúlkan hefði hlotið alvarlega áverka, en í dag sagði Magnusson að ástand hennar væri stöðugt.

„Ástand hennar er stöðugt og henni heilsast vel,“ sagði hann.

Samkvæmt upplýsingum Aftonbladet var einn einstaklingur handtekinn í tengslum við málið. Þar sem um var að ræða dreng undir 15 ára aldri var handtakan síðar felld niður og drengurinn færður í umsjá barnaverndaryfirvalda. Lögreglan staðfesti þetta á þriðjudag.

„Skömmu eftir að lögregla kom á vettvang var drengur handtekinn í nágrenninu. Handtakan var síðan felld niður vegna ungs aldurs hans og hann var færður í umsjá félagsþjónustunnar,“ sagði Magnusson.

Samkvæmt heimildum Aftonbladet hljóp drengurinn af vettvangi eftir árásina og hringdi sjálfur í neyðarlínuna 112 þar sem hann sagði frá því sem hann hefði gert. Það varð til þess að umfangsmikil leit hófst og stúlkan fannst í kjölfarið.

Fram kemur að árásin virðist hafa verið tilefnislaus og að ekkert bendi til þess að tengsl hafi verið á milli stúlkunnar og drengsins.

Málið er rannsakað sem tilraun til manndráps.

„Við vinnum nú af miklum krafti að rannsókn málsins. Það er mikilvægt fyrir okkur að fá skýra mynd af því hvað gerðist á vettvangi og hvers vegna þetta átti sér stað,“ sagði Christian Magnusson.