Erla Hrönn Júlíusdóttir, kennari í unglingadeild Foldaskóla í Grafarvogi, segir að aðstoð frá VIRK hafi skipt sköpum þegar hún glímdi við alvarleg einkenni streitu og álags í fyrra en hún segir frá þessu í árskýrslu VIRK.
Erla Hrönn leitaði til heimilislæknis í febrúar 2025 eftir að hafa fundið fyrir miklum kvíða, þreytu, einbeitingarskorti, minnisleysi og aftengingu við umhverfi sitt. Hún segir einkennin hafa verið orðin það alvarleg að þau hafi haft áhrif á öryggi hennar í daglegu lífi.
Heimilislæknir hennar benti henni á forvarnarsvið VIRK, sem er ætlað að grípa inn í áður en fólk fellur út af vinnumarkaði vegna veikinda. Aðeins tveimur vikum eftir að beiðni var send fékk Erla Hrönn viðtal hjá forvarnaráðgjafa.
Að hennar sögn reyndist skjót viðbrögð lykilatriði í bataferlinu. Hún segir ráðgjafann hafa greint stöðu hennar vel, leiðbeint henni um viðeigandi úrræði og stutt hana í gegnum ferlið. Þá hafi markþjálfun sem hún fékk í kjölfarið hjálpað henni að átta sig betur á styrkleikum sínum og hvernig hún gæti nýtt þá bæði í starfi og einkalífi.
Erla Hrönn segir að með aðstoðinni hafi hún lært að setja skýrari mörk, hlusta betur á eigin líðan og tileinka sér einföld en áhrifarík bjargráð gegn streitu. Afleiðingin hafi verið aukið úthald, betri einbeiting og minni kvíði.
Hún segir það hafi skilað henni aftur til vinnu sterkari en áður og að hún finni nú aftur fyrir þeim jákvæða og félagslynda persónuleika sem hafi horfið í skugga veikindanna. „VIRK bjargaði mér og það var gert hratt og örugglega,“ segir Erla Hrönn.
