Fimm unglingar drukknuðu í norðurhluta Víetnam í dag þegar einn þeirra lenti í straumhörðum á og fjórir vinir hans stukku út í til að reyna að bjarga honum. Þetta kemur fram í fréttum ríkisfjölmiðla í landinu.

Slysið varð í Phu Tho-héraði eftir skólatíma þegar nemendurnir, sem voru 13 og 14 ára gamlir, fóru í sundferð að loknu námi fyrir próf. Samkvæmt fréttavefnum VNExpress náðu björgunarsveitir að finna lík allra fimm nemendanna í Lo-ánni snemma um kvöldið.

Annað banaslys varð í Dak Lak-héraði á laugardag þegar fjögur grunn- og gagnfræðaskólabörn drukknuðu í Banh Lai-ánni. Börnin voru einnig sögð hafa lent í sterkum straumi meðan þau syntu.

Samkvæmt upplýsingum frá heilbrigðisráðuneyti Víetnams drukkna um 2.000 börn á aldrinum fimm til fimmtán ára árlega í landinu. Yfirvöld hafa ítrekað varað við hættum sem fylgja sundi í ám og vötnum, sérstaklega yfir regntímann þegar straumar geta orðið mjög varasamir.