Foreldrar nýbura sem lést aðeins eins dags gamall hafa verið ákærð fyrir manndráp í Pennsylvaníu í Bandaríkjunum eftir að rannsókn leiddi í ljós að barnið hafi orðið fyrir alvarlegu ofbeldi á fæðingardeild sjúkrahúss.

Samkvæmt upplýsingum frá saksóknaraembættinu eru foreldrarnir, Kevin Canaan og Yeniffer Tavarez-Cepeda, sökuð um að hafa beitt son sinn líkamlegu ofbeldi á meðan þau dvöldu með honum á Tower Health Reading-sjúkrahúsinu fyrr í þessum mánuði.

Lögreglan var kölluð á sjúkrahúsið vegna gruns um ofbeldi eftir að nýburinn fannst í lífshættulegu ástandi inni á einkafæðingarstofu foreldra sinna. Fram kemur að barnið hafi áður virst við góða heilsu og ekkert bent til þess að alvarlegt væri að.

Drengurinn var fluttur í skyndi á Penn State Hershey-sjúkrahúsið þar sem hann lést síðar af áverkum sínum.

Samkvæmt saksóknara töldu læknar að áverkar barnsins hefðu ekki orðið við fæðinguna sjálfa. Krufning leiddi síðar í ljós að um manndráp hefði verið að ræða og að dánarorsökin væri „margvíslegir alvarlegir áverkar“.

Rannsókn lögreglu og saksóknara leiddi jafnframt í ljós að foreldrarnir hefðu verið ein með barninu inni á stofunni þegar banvænu áverkarnir urðu.

Foreldrarnir hafa nú verið ákærð fyrir manndráp, stórfellda líkamsárás og að hafa stofnað velferð barns í hættu.