Ljósið fékk á dögunum veglegan styrk frá mótorhjólaklúbbnum Sober Riders MC á Íslandi þegar meðlimir klúbbsins afhentu 750 þúsund krónur til stuðnings starfsemi miðstöðvarinnar.
Styrkurinn var afhentur 8. maí síðastliðinn og tók Valgý Arna Eiríksdóttir, iðjuþjálfi hjá Ljósinu, við honum fyrir hönd miðstöðvarinnar.
Fjáröflunin tengist árlegri hefð Sober Riders MC á Íslandi á Þorláksmessu, þegar meðlimir klúbbsins bjóða vegfarendum á Laugavegi upp á hina svokölluðu „Andskötusúpu“ undir slagorðinu: „Við bjóðum engan viðbjóð.“
Súpan er ætíð ókeypis, en fólki gefst kostur á að styrkja gott málefni og samkvæmt tilkynningunni hafa þakklátir gestir sýnt framtakinu mikinn stuðning. Í ár rann ágóðinn til Ljóssins.
Ljósið er endurhæfingar- og stuðningsmiðstöð fyrir fólk sem greinst hefur með krabbamein og aðstandendur þess. Þar er lögð áhersla á sérhæfða endurhæfingu og stuðning með það að markmiði að efla bæði líkamlegt og andlegt þrek skjólstæðinga.
Í fréttatilkynningunni kemur fram að tæplega 600 manns sæki þjónustu og fræðslu hjá Ljósinu í hverjum mánuði. Frá upphafi hafi markmiðið verið að veita þjónustuna án endurgjalds og byggir starfsemin því að miklu leyti á stuðningi einstaklinga og fyrirtækja.
Erna Magnúsdóttir, framkvæmdastýra Ljóssins, þakkar meðlimum Sober Riders MC á Íslandi sérstaklega fyrir stuðninginn og segir framlagið afar dýrmætt fyrir starfsemi miðstöðvarinnar.
