Ungur íbúi á Stöðvarfirði ákvað að setja upp eigið hraðamælingakerfi eftir að hafa haft áhyggjur af miklum hraðakstri í gegnum þorpið. Niðurstöðurnar benda til þess að meirihluti ökumanna aki yfir leyfilegum hámarkshraða. Austurfrétt fjallaði um málið.

Þórhallur Ingimar Atlason, sem býr við þjóðveginn í gegnum þorpið, keypti doppler-radarmæli sambærilegan þeim sem lögregla notar og tengdi hann við tölvubúnað til að fylgjast með hraða bifreiða.

Í sex klukkustunda mælingu þann 18. maí kom í ljós að tæplega 72 prósent ökutækja óku hraðar en leyft er en 40 km hámarkshraði er í þorpinu. Yfir 30 ökumenn mældust á milli 50 og 77 km hraða, þar á meðal rútur og vörubílar.

Þórhallur segir búnaðinn ekki löggiltan en telur mælingarnar þó nokkuð áreiðanlegar eftir að hafa prófað tækin sjálfur.

Hann reiknaði einnig út að ef lögregla hefði sektað alla ökumennina sem mældust á of miklum hraða á þessum sex tímum hefðu sektirnar numið um 1,2 milljónum króna.