Sigurjón Egilsson, fyrrverandi ritstjóri DV og fyrrverandi fréttastjóri Fréttablaðsins, vill meina að Morgunblaðið hafi viljandi birt slæma mynd af Degi B. Eggertssyni, þingmanni Samfylkingarinnar og fyrrverandi borgarstjóra, í blaði dagsins.

„Mogginn birti þessa mynd af Degi í blaði dagsins. Ósmekklegt. En það er annað mál. Á þeim árum sem ég var stjórnandi Sprengisands spurði þáverandi forsætisráðherra, SDG, mig hvers vegna Fréttablaðið birti betri myndir af Degi en af sér. Í hljóði svaraði ég, líttu í spegil.“

Greinir hann frá þessu í færslu á Facebook. Dagur hefur sjálfur gagnrýnt blaðið fyrir einmitt slíkt í mars á þessu ári.

Kristján Johannessen, fréttastjóri hjá Morgunblaðinu, segir þetta hins vegar vera tuð hjá Sigurjóni og bendir á aðra mynd sem blaðið birti af Degi í sama blaði. Spyr hann svo í kjölfarið hvort Sigurjón sé sáttur við hana eða ætli að móðgast fyrir hönd Dags.

Alexandra Briem, borgarfulltrúi Pírata, skrifar einnig athugasemd og vill meina að sumir fjölmiðlar stundi svona hegðun.

„Mér finnst þessi tilhneiging sumra fjölmiðla, að velja vísvitandi slæmar myndir af stjórnmálafólki sem þeir eru ekki sammála, eitt af því barnalegasta sem ég hef séð,“ skrifar Alexandra um málið.

„Ég hefði bara í alvöru varla trúað því upp á fullorðið fólk að vinna þannig, en hef núna það mikla reynslu af þessu að ég efast ekki lengur um að þetta sé tiltölulega algengt.“

Gunnlaugur Snær Ólafsson telur hins vegar að um misskilning sé að ræða.

„Staðreyndin er reyndar sú að sumir lesendur virðast lesa mun meira í myndaval fjölmiðla en það sem blaðamenn hafa tíma til að velta þessu fyrir sér. Þessi myndavalsumræða er einnig góð leið til að þurfa ekki að ræða innihald og grefur undan upplýstri umræðu,“ skrifar hann til Alexöndru.

„Er ekki betra að við öll hættum að reyna af ásetningi að misskilja hvort annað?“ spyr hann svo að lokum.