Helga Garðarsdóttir, yfirmaður á hjúkrunar- og dvalarheimilinu Barmahlíð, hefur ekki þekkingu á máli Oliviu Ragnheiðar Zieba en hún var nýverið dæmd í fangelsi fyrir að hafa misnotað aðstöðu sína sem starfsmaður Barmahlíðar og tekið rúmlega 1,2 milljónir króna af bankareikningi vistmanns heimilisins.

Í svörum Helgu til Mannlífs greinir hún frá því að hún sé að sinna starfinu tímabundið í þrjá mánuði og viti því lítið um málið. Mannlíf hafði óskað eftir ýmsum upplýsingum frá Barmahlíð, eins og hvernig málið hafi komist upp og hvaða skref hjúkrunar- og dvalarheimilið hafi tekið til að koma í veg fyrir að svona mál gæti endurtekið sig.

Hún staðfesti þó að Olivia Ragnheiður væri ekki lengur starfsmaður Barmahlíðar.

Samkvæmt dóminum þáði Olivia debetkort vistmannsins og nýtti sér að hann væri með vitræna skerðingu og ekki fær um að átta sig á eigin fjármálum. Hún notaði debetkortið í eigin þágu í alls 48 skipti á tímabilinu frá 7. júní til 25. júlí árið 2023. Um var að ræða bæði úttektir úr hraðbanka og greiðslur fyrir vörur og þjónustu. Heildarfjárhæðin nam 1.231.766 krónum.