Kylie Jenner hefur nú verið stefnt af fyrrverandi húshjálp sinni, Angelica Vasquez, sem sakar hana um að hafa niðurlægt hana „fyrir framan samstarfsfólk vegna uppruna síns“ meðan hún starfaði á heimili Jenner í Hidden Hills í Kaliforníu.
Samkvæmt dómskjölum sem E! News hefur undir höndum heldur Vasquez því fram að hún hafi orðið fyrir „alvarlegri og viðvarandi áreitni“ í starfi sínu. Málið beinist þó ekki sérstaklega að Jenner sjálfri, þó hún sé skráð sem einn hinna stefndu ásamt tveimur félögum og 25 ónafngreindum einstaklingum.
Lýsir „eitruðu vinnuumhverfi“
Vasquez, sem er sögð salvadórísk og kaþólsk, segir að hún hafi ítrekað fengið erfiðustu og óæskilegustu verkefnin, verið útilokuð frá samstarfsfólki og niðurlægð opinberlega:
„Hún var reglulega látin taka að sér erfiðustu og óæskilegustu verkefnin; útilokuð frá ræstingarteyminu; niðurlægð og smánuð opinberlega fyrir framan samstarfsfólk vegna kynþáttar síns, þjóðernis og trúar; og sætti hótunum og niðrandi framkomu.“
Í kærunni segir að þetta hafi skapað „eitrað og ofbeldisfullt vinnuumhverfi“ og að yfirmenn hafi ekki gripið inn í þrátt fyrir að verða vitni að hegðuninni.
Segir ástandið hafa versnað
Þegar Vasquez reyndi að kvarta segir hún að aðstæður hafi versnað enn frekar:
„Aukin vinnubyrði; færri vinnutímar; rangar ásakanir og áminningar; áframhaldandi opinber niðurlæging; og fjandsamleg munnleg og líkamleg framkoma.“
Hún heldur því einnig fram að atvik hafi orðið ofbeldisfull í mars 2025 þegar yfirmaður kastaði herðatrjám í átt að fótum hennar á meðan hann áminnti hana.
Kveðst kvíðin og krefst skaðabóta
Vasquez segist hafa þróað með sér kvíða, mikla streitu og einkenni áfallastreituröskunar sem leiddu til veikindaleyfis sumarið 2025. Við endurkomu hafi aðstæður ekki batnað og í ágúst sama ár hafi hún sagt upp störfum þar sem vinnuaðstæður voru orðnar óbærilegar.
Hún krefst nú skaðabóta, þar á meðal vegna ógreiddra launa, yfirvinnu, veikindaréttar og annars sem hún telur hafa verið haldið eftir með ólögmætum hætti.
Kylie Jenner hefur enn ekki tjáð sig opinberlega um málið.
