Guðmundur Þ. Gíslason var dæmdur í 30 daga skilorðsbundið fangelsi í Héraðsdómi Reykjavíkur fyrir líkamsárás gegn 11 ára dreng og brot gegn barnaverndarlögum.

Málið á rætur að rekja til atviks sem átti sér stað í Reykjavík í nóvember 2024 þegar hópur drengja var að gera svokallað „dyraat“ við heimili Guðmundar. Við það brotnaði rúða í útidyrahurð hússins. Guðmundur hljóp á eftir drengjunum og náði einum þeirra, sem síðar reyndist vera 11 ára gamall.

Samkvæmt niðurstöðu dómsins var sannað að Guðmundur hefði slegið drenginn í andlitið með þeim afleiðingum að hann hlaut glóðarauga og áverka á hálsi. Hins vegar þótti ekki næg sönnun fyrir því að hann hefði tekið drenginn hálstaki eða ýtt honum í jörðina, eins og ákært hafði verið fyrir.

Guðmundur játaði fyrir dómi að hafa slegið drenginn með flötum lófa en hélt því fram að um ósjálfráð viðbrögð hefði verið að ræða eftir að drengurinn sló síma úr höndum hans. Dómurinn hafnaði þeirri skýringu og taldi að Guðmundur hefði haft ásetning til verknaðarins.

Við ákvörðun refsingar leit dómurinn meðal annars til þess að atlaga hans hefði beinst að barni. Þá var einnig horft til þess að Guðmundur hafði ekki áður gerst sekur um refsiverða háttsemi.

Auk fangelsisdómsins var Guðmundi gert að greiða drengnum 400 þúsund krónur í miskabætur ásamt vöxtum og hluta sakarkostnaðar.