Fjögur af fimm stærstu sláturhúsum landsins hyggjast sækjast eftir halal-vottun á lambakjöti í ár. Sláturfélag Suðurlands sker sig úr en félagið, sem hefur verið með vottunina undanfarin þrjú ár, telur ekki þörf á henni að þessu sinni.
RÚV greinir frá þessu
Halal-vottun íslensks lambakjöts hefur tíðkast frá árinu 2010 og segja forsvarsmenn sláturhúsa ástæðurnar fyrst og fremst markaðslegar. Vottunin auðveldar sölu á erlendum mörkuðum og getur skilað hærra verði fyrir afurðir sem minni eftirspurn er eftir hérlendis.
Íslenskt lambakjöt er meðal annars flutt til Noregs og þaðan áfram til markaða í Mið-Austurlöndum. Norðmenn gera kröfu um halal-vottun á slíku kjöti.
Benedikt Benediktsson, framleiðslustjóri SS, segir minni þörf fyrir útflutning vegna samdráttar í framleiðslu og góðrar sölu innanlands. Því sjái félagið ekki hag í að sækjast eftir vottuninni í ár.
Sigurður B. Rafnsson, sláturhússtjóri Kaupfélags Skagfirðinga á Sauðárkróki, segir vottunina mikilvæga til að selja afurðir á borð við slög og hálsa erlendis, meðal annars í kebabframleiðslu í Bretlandi.
Forsvarsmenn sláturhúsanna leggja áherslu á að slátrunaraðferðin breytist ekki vegna halal-vottunar. Sauðfé er deyft með raflosti áður en skorið er á háls samkvæmt íslenskum reglum en slátrun án deyfingar er bönnuð á Íslandi. Við halal-vottaða slátrun þarf sá sem framkvæmir hálsskurðinn að vera múslimi og fara með bæn.
„Það er enginn munur. Munurinn er að sá sem að sker skepnuna verður að vera múslimatrúar. Hann fer með bænina í huganum. Ég hef aldrei heyrt hann fara með bænina, allavegana ekki í þessu húsi. Ég veit ekki hvernig þetta er annars staðar,“ segir Sigurður um málið.
