Yfirmaður breska hersins segir að stjórnmálaleiðtogar Bretlands muni brátt hefja „hreinskilnar umræður“ við almenning um nauðsyn þess að búa sig undir stríð. Þetta kemur fram í frétt Sky-News.
Sir Roly Walker hershöfðingi segir að allir borgarar verði beðnir um að færa fórnir og leggja sitt af mörkum til varna landsins. Hann lét þessi orð falla í heimsókn til hermanna í Catterick-herstöðinni í Norður-Yorkshire í síðustu viku. Breska herútvarpið BFBS tók ummælin upp á myndband.
„Þið vissuð þetta ekki, en þjóð okkar mun þurfa á ykkur að halda,“ sagði yfirmaður herráðsins við hóp um 700 hermanna.
„Það kom sá tími að þjóð okkar vildi ekki hugsa um þann möguleika að hún þyrfti á hermönnum sínum að halda til að berjast í stríði,“ sagði hann.
„En mjög bráðlega munu stjórnmálaleiðtogar þessa lands hefja hreinskilnar umræður við almenning um hvað sé í raun að gerast og hvar hætturnar liggja.“
Hann sagði að leiðtogarnir myndu reyna að útskýra fyrir almenningi að fólk þyrfti að samþykkja að fórna einhverju til að setja varnir og öryggi í forgang.
„Síðan munu þeir biðja borgarana, sem hafa ekki endilega varnir landsins efst í huga, um að leggja sitt af mörkum til varna þess og öryggis,“ sagði Walker.
„Þeir þurfa að skilja hvað við gerum fyrir þá. Þeir þurfa að samþykkja að við fáum að sinna því. Það þýðir að þeir þurfa sjálfir að færa fórnir.“
Hann bætti við að herinn þyrfti stuðning almennings til að geta sinnt því verkefni sem hermennirnir einir gætu tekið að sér: að sækja baráttuna heim til óvinarins.
Fyrirheit um þjóðarumræðu enn óuppfyllt
Andy Burnham tók við fyrirheiti sem Keir Starmer, fyrrverandi forsætisráðherra, hafði gefið um að hefja þjóðarumræðu um varnir landsins. Meira en 18 mánuðir eru þó liðnir síðan það var gefið.
Án þess að stjórnvöld hafi þrýst á um slíka umræðu hafa umræður um varnir og öryggismál farið fram víða innan geirans, meðal annars í hlaðvarpi Sky News og sjónvarpsþáttaseríu miðilsins sem bæði bera heitið The Wargame.
Einnig er gert ráð fyrir að forsætisráðherrann hefji nýja herferð til að hvetja öll heimili til að vera betur undirbúin fyrir hvers kyns neyðarástand, allt frá flóðum og þurrkum til vopnaðra átaka. Það er enn eitt verkefnið sem núverandi ríkisstjórn tók við af þeirri fyrri en hefur ekki enn hrint í framkvæmd.
