Fjölbragðaglímugoðsögnin Hulk Hogan sagðist hafa tekið gríðarlega háa og lífshættulega skammta af lyfinu fentanýl til að ráða við mikla líkamlega verki á meðan hann starfaði hjá Total Nonstop Wrestling (TNA) eftir skilnað sinn við eiginkonu sína, Lindu Hogan.

Þetta kemur fram í heimildarþáttaröðinni Hulk Hogan: Real American á Netflix, sem jafnframt var síðasta viðtal hans áður en hann lést skyndilega úr hjartaáfalli í júlí 2025, 71 árs að aldri.

„Þú ættir að vera látinn“

Hogan segir að hann hafi gengið til liðs við TNA eftir skilnaðinn árið 2009, þar sem hann hafi þurft á tekjum að halda eftir að hafa „gefið allt“ í skilnaðinum. Fljótlega hafi þó komið í ljós að hann væri ekki lengur í líkamlegu ástandi til að keppa á því stigi sem samið hafði verið um.

Til að takast á við mikla verki greip hann til fentanýls.

„Ég var að taka 80 milligröm af fentanýli, tvo skammta á morgnana og setti undir tannholdið … ég var líka með tvo 300 mg plástra á fótunum og fékk sex 1500 mg fentanýl-sleikjóa,“ segir hann.

Hann segir lyfjafræðing hafa fengið áfall þegar hann sá skammtana.

„Hann sagði: „Þú ættir að vera látinn. Við höfum aldrei séð manneskju taka svona mikið af fentanýli“.“

Gat varla hreyft sig

Verkirnir voru svo miklir að Hogan þurfti að sofa sitjandi í stól.

„Ef ég hreyfði bara fingur svona, þá fór allt bakið í krampa og snérist,“ segir hann og sýnir fingrahreyfingu.

Síðasta framkoma hans í hringnum var árið 2012 og hann hætti hjá TNA árið eftir þegar samningur hans rann út.