Tveir bandarískir ríkisborgarar voru handteknir í Japan um helgina eftir að annar þeirra fór inn í aparými í dýragarði skammt utan við Tókýó þar sem apinn Punch hefur vakið heimsathygli á samfélagsmiðlum á þessu ári. Lögregla greindi frá málinu í dag.

Atvikið átti sér stað í Ichikawa City Zoo þegar 24 ára bandarískur háskólanemi klifraði yfir girðingu og ofan í skurð sem umlykur aparýmið. Samferðamaður hans, 27 ára söngvari, tók upp myndband af uppátækinu. Myndefni sem birtist á samfélagsmiðlum sýnir mann í búningi og með sólgleraugu klifra yfir girðinguna, sem varð til þess að aparnir urðu hræddir

Samkvæmt lögreglu komust mennirnir ekki í snertingu við dýrin og starfsfólk dýragarðsins hafði fljótt afskipti af þeim. Mennirnir eru grunaðir um að hafa hindrað starfsemi garðsins með ólögmætum hætti, en þeir neita sök. Þá segir lögregla að þeir hafi ekki verið með skilríki og í fyrstu gefið upp röng nöfn.

Dýragarðurinn hefur undanfarna mánuði orðið vinsæll meðal ferðamanna eftir að Punch varð netstjarna. Aparunginn vakti mikla samúð þegar birtar voru myndir af honum faðma IKEA-apa eftir að móðir hans hafnaði honum.

Málið kemur á sama tíma og umræða hefur aukist í Japan um óviðeigandi hegðun erlendra ferðamanna.