Franskur áfrýjunardómstóll dæmdi á föstudag kvikmyndaleikstjórann Christophe Ruggia í fimm ára fangelsi fyrir kynferðisbrot gegn barnungri leikkonu, í einu af lykilmálum #MeToo-hreyfingarinnar í Frakklandi.
Ruggia, sem er 61 árs, hafði þegar verið fundinn sekur á síðasta ári fyrir að hafa brotið gegn leikkonunni Adèle Haenel þegar hún var á aldrinum 12 til 14 ára í byrjun 21. aldar, á meðan hann var á fertugsaldri. Upphaflegur dómur féll í febrúar 2025 og hlaut hann þá fjögurra ára dóm, auk þess að vera gert að bera rafrænt ökklaband í tvö ár.
Áfrýjunardómstóll í París þyngdi hins vegar dóminn og dæmdi hann í fimm ára fangelsi, þar af þrjú ár skilorðsbundin. Hann mun áfram þurfa að afplána tvö ár undir rafrænu eftirliti.
Haenel, sem vakti alþjóðlega athygli fyrir leik sinn í kvikmyndinni Portrait of a Lady on Fire, hefur látið af leiklist og var sú fyrsta af þekktum frönskum leikkonum til að saka kvikmyndaiðnaðinn um að líta fram hjá kynferðisofbeldi.
Ruggia leikstýrði henni í kvikmyndinni The Devils árið 2002, sem var fyrsta hlutverk hennar. Myndin vakti deilur, meðal annars vegna kynferðislegra sena þar sem börn voru í forgrunni.
Samkvæmt rannsókn málsins lýstu meðlimir kvikmyndateymisins óþægindum með hegðun Ruggia á tökustað. Þá hefur Haenel borið fyrir dómi að á árunum 2001 til 2004 hafi hún heimsótt leikstjórann reglulega, þar sem hann hafi meðal annars snert hana á kynferðislegan hátt.
Dómstóllinn taldi brotin „afar alvarleg“ gagnvart barnungri stúlku og að þau hefðu haft „sannanleg áhrif á andlega heilsu“ Haenel. Málið er talið eitt það mikilvægasta í umræðu um kynferðisofbeldi innan franska kvikmyndageirans.
