Ísraelskir landnemar eru sakaðir um að hafa kveikt í al-Rahma-moskunni í bænum Qusra á hernumda Vesturbakkanum, á sama tíma og hundruð Ísraela söfnuðust saman í Tel Aviv til að mótmæla vaxandi ofbeldi landnema og hernámi Ísraels á palestínsku landsvæði.
Myndskeið sem Al Jazeera hefur staðfest sýna moskuna loga en palestínskar heimildir segja landnema bera ábyrgð á íkveikjunni. Atvikið átti sér stað skömmu eftir að ísraelskar öryggissveitir hófu umfangsmiklar aðgerðir á Vesturbakkanum í kjölfar nýlegra árása þar sem fjórir Palestínumenn og tveir ísraelskir hermenn létust.
Samkvæmt palestínsku fréttastofunni Wafa voru um 80 Palestínumenn handteknir í húsleitum og aðgerðum víða um Vesturbakkann, meðal annars í Ramallah, Jenin, Hebron, Betlehem og Tulkarem. Þá var gerð umfangsmikil innrás í Jenin og fjölda bæja og þorpa í nágrenninu.
Ísraelski ríkisfjölmiðillinn Kan greindi jafnframt frá því að hertar umferðartakmarkanir og fjölmargir öryggiseftirlitsstaðir hefðu verið settir upp á helstu vegum og við innganga þorpa á Vesturbakkanum.
Samkvæmt palestínskum upplýsingum hafa ísraelskir hermenn og landnemar frá 7. október 2023 banað að minnsta kosti 1.185 Palestínumönnum á Vesturbakkanum, þar af um 250 börnum. Yfir 12.600 hafa særst og meira en 24.000 verið handteknir. Talið er að rúmlega 9.200 Palestínumenn séu nú í ísraelskum fangelsum, þar af um 3.200 án þess að hafa verið ákærðir.
Sameinuðu þjóðirnar og mannréttindasamtök hafa ítrekað gagnrýnt Ísrael fyrir að bregðast ekki við ofbeldi landnema með fullnægjandi hætti og segja að sjaldan sé ákært í slíkum málum.
Á sama tíma mótmæltu hundruðir Ísraela á Kaplan-götu í Tel Aviv vaxandi ofbeldi landnema og herstjórn Ísraels á Vesturbakkanum. Lögreglan handtók níu mótmælendur og sagði samkomuna hafa farið fram án leyfis og raskað umferð og allsherjarreglu.
