Þýskur lestarstjóri fann á fimmtudag kassa með 20 lifandi tarantúlum sem farþegi hafði óvart skilið eftir um borð í lest, að því er alríkislögreglan í Stuttgart greindi frá á föstudag.

Pakkinn, sem var merktur „Köngulær og sporðdrekar“, fannst eftir að 31 árs kona steig út úr lestinni án þess að taka hann með sér. Lögregla mætti lestinni á stöðinni í bænum Tübingen og opnaði pakkann til að kanna innihald hans.

Eigandi dýranna gaf sig fram síðar sama dag og sótti köngulærnar sínar. Samkvæmt upplýsingum frá lögreglunni í Stuttgart hafði atvikið engin áhrif á lestarumferð og verður konan ekki kærð vegna málsins.