Lárus Freyr Einarsson er einn þriggja Íslendinga sem sæta nú gæsluvarðhaldi vegna rannsóknar lögreglu á meintu smygli á 106 kílóum af kókaíni sem flutt var til landsins með skipi frá Brasilíu og fannst falinn í sjókistu skips við Straumsvík en RÚV greinir frá þessu.

Alls sitja níu einstaklingar í gæsluvarðhaldi vegna málsins, þar af þrír Íslendingar og sex erlendir ríkisborgarar, meðal annars frá Brasilíu og Rúmeníu.

Lárus hlaut árið 2011 fjórtán ára fangelsisdóm í Danmörku fyrir manndráp eftir að hafa skotið konu til bana í Horsens. Hann var einnig handtekinn og úrskurðaður í gæsluvarðhald árið 2020 vegna gruns um aðild að stórfelldri amfetamínframleiðslu í sumarbústað í Kjós, en rannsókn þeirri lauk án þess að ákæra yrði gefin út á hendur honum.

Samkvæmt heimildum fundust um 30 kíló af kókaíni í bifreið sem tengist Lárusi.