Héraðsdómur Reykjaness hefur sakfellt Margréti Friðriksdóttur fyrir ærumeiðingar og ærumeiðandi aðdróttanir í garð Barböru Björnsdóttur, héraðsdómara við Héraðsdóm Reykjavíkur.

DV greindi frá niðurstöðu málsins.

Málið á rætur að rekja til ummæla sem Margrét birti á Facebook-síðu sinni í kjölfar þess að Barbara sakfelldi hana fyrir hótanir í garð Semu Erlu Serdar. Síðar var þeim dómi snúið við í Landsrétti og Margrét sýknuð af þeim ákæruliðum.

Í umræddum færslum lét Margrét meðal annars þau ummæli falla að Barbara væri „lauslát mella“ og hélt því fram að hún hefði átt í framhjáhaldssambandi við þáverandi yfirmann sinn, Símon Sigvaldason.

Samkvæmt dómi Héraðsdóms Reykjaness var Margrét sakfelld samkvæmt ákæru og dæmd til að greiða 200 þúsund króna sekt. Verði sektin ekki greidd innan fjögurra vikna kemur 14 daga fangelsisrefsing í hennar stað.