Bandaríkjaforseti hefur náðað fyrrverandi þingmann úr röðum Repúblikana, George Santos, fljótlega eftir að hann var dæmdur í sjö ára fangelsi fyrir margvísleg brot í máli sem vakti heimsathygli.
„Að minnsta kosti hafði Santos hugrekkið, sannfæringuna og vitsmunina til að KJÓSA ALLTAF REPÚBLIKANA,“ sagði Donald Trump, þegar hann tilkynnti ákvörðun sína á samfélagsmiðli hans. Þannig sýnir Trump að hann sé líklegur til að verðlauna brotamenn ef þeir hafa sögu um að kosið flokkinn hans.
Santos mun einnig sleppa við að borga tæplega 50 milljónir króna í bætur til fórnarlamba sinna.
Trump hefur náðað yfir 1.600 manns eftir að hann var kjörinn forseti, en flestir þeirra voru þau sem réðust inn í bandaríska þinghúsið í janúar 2021, eftir að Trump hafði hvatt hópinn áfram og ítrekað haldið því fram að hann hefði tapað forsetakosningunum vegna kosningasvindls.
Á móti hefur Trump skilgreint andfasista, eða þá mótmælendur sem kenndir eru við Antifa, sem hryðjuverkamenn og hótað að leita þá uppi.
George Santos hafði verið þingmaður í eitt ár þegar röð hneykslismála leiddi til þess að þingmenn greiddu atkvæði um að svipta hann þingsæti.
„Hann var svolítill útlagi, en það eru margir útlagar sem eru ekki neyddir til að sitja sjö ár í fangelsi,“ sagði Trump. „Hann laug eins og andskotinn, en var alltaf 100% með Trump,“ bætti hann við.
Santos hafði skrifað opið bréf til forsetans fullt af lofi. „Þú hefur alltaf verið maður annarra tækifæra, leiðtogi sem trúir á endurlausn og endurnýjun. Ég bið þig nú, úr dýpstu iðrum hjarta míns, um að færa þá trú yfir á mig.“
