Karlmaður á þrítugsaldri hefur verið ákærður fyrir umfangsmikil fíkniefna- og peningaþvættisbrot auk aksturs sviptur ökuréttindum. Málið verður tekið fyrir í Héraðsdómi Reykjaness þann 30. júní næstkomandi.
Samkvæmt ákæru ók maðurinn bifreið eftir Hafnargötu í Reykjanesbæ þann 4. júní 2023 þrátt fyrir að hafa verið sviptur ökuréttindum. Við leit lögreglu á bifreiðinni fundust 0,38 grömm af kókaíni og tæplega 190 grömm af maríhúana sem samkvæmt ákæru voru ætluð til söludreifingar í ágóðaskyni.
Þá er maðurinn einnig ákærður fyrir peningaþvætti á tímabilinu frá janúar 2022 til júní 2023. Samkvæmt ákæru nam fjárhæðin rúmlega 15,7 milljónum króna sem talið er að hafi verið ávinningur af refsiverðri starfsemi, meðal annars fíkniefnasölu. Fjármunirnir voru lagðir inn á bankareikninga mannsins hér á landi.
Lögregla lagði jafnframt hald á reiðufé að fjárhæð 10.610 evrur og 10.995 bandaríkjadali þegar maðurinn var stöðvaður í Leifsstöð 15. júní 2023 á leið til Varsjár í Póllandi.
Þess er krafist að ákærði verði dæmdur til refsingar og til greiðslu alls sakarkostnaðar.
