Nói Síríus sem er eitt rótgrónasta framleiðslufyrirtæki landsins og á sér rúmlega aldarlanga sögu hefur lækkað verð á öllum súkkulaðivörum sínum um 10%. Verðlækkunin tók gildi 1. júní og nær jafnt til innlendra og erlendra vörumerkja fyrirtækisins.
Sigríður Hrefna Hrafnkelsdóttir, forstjóri Nóa Síríus segir „að þegar hrávöruverð hækkaði lögðum við mikið á okkur til að mæta auknum kostnaði með hagræðingu, breyttum verkferlum og stöðugum samskiptum við birgja og viðskiptavini. Það varð til þess að verð hjá okkur hækkaði minna en sem nam breytingum á heimsmarkaðsverði. Nú þegar verð á helsta hráefninu í framleiðslunni er stöðugra viljum við stíga fyrstu skref í að skila ávinningi áfram til viðskiptavina.“
Nói Síríus færist aftur í innlenda eigu
„Undanfarin ár hafa verið fordæmalaus í verðlagningu á hrávöru til súkkulaðiframleiðslu. Þurrkar og erfið ræktunarskilyrði á helstu kakósvæðum heimsins héldu heimsmarkaðsverði á kakói og kakósmjöri í sögulegum hæðum, sem kallaði á verðhækkanir hjá framleiðendum víða um heim. Nú hefur dregið úr þessum þrýstingi samhliða auknu framboði, og það ásamt hagræðingu og bættum framleiðsluferlum hefur skapað svigrúm til að lækka verð.“
Sjóðurinn AF3, sem er í rekstri Alfa Framtaks, keypti fyrr á árinu allt hlutafé í Nóa Síríusi af Orkla Snacks. Samkeppniseftirlitið hefur heimilað kaupin og hefur Nói Síríus því færst aftur í innlenda eigu.
