Innleiðing á nýju evrópsku landamærakerfi hefur skapað verulegar tafir og öngþveiti í vopnaleit og vegabréfaskoðun á Keflavíkurflugvelli að undanförnu. Landamæraeftirlit með farþegum sem koma utan Schengen-svæðisins tekur nú allt að sex til sjö sinnum lengri tíma en áður var og hafa hvorki aukið fjármagn né fjölgun starfsfólks dugað til að leysa vandann.
Samkvæmt upplýsingum frá lögreglunni á Suðurnesjum hefur afgreiðslutími hvers farþega lengst úr 15–20 sekúndum upp í rúmar 60 sekúndur að meðaltali. Í þeim tilvikum þar sem tæknilegir örðugleikar koma upp getur ferlið tekið allt að eina og hálfa mínútu á hvern einstakling. Tafirnar skýrast af nýjum kröfum um að taka fingraför og ljósmyndir af farþegum og samkeyra upplýsingarnar við gagnagrunna í Brussel.
Mesta álagið skapast þegar stórar flugvélar frá Bretlandi, Bandaríkjunum og Kanada lenda á svipuðum tíma, en þá geta á bilinu 30 til 33 vélar verið á svæðinu samtímis.
Til stóð að mæta þessum áskorunum með uppsetningu nýrra sjálfsafgreiðslustöðva sem komið var fyrir í komusal flugvallarins í október síðastliðnum. Þær vélar hafa hins vegar ekki virkað sem skyldi og standa nú ónotaðar. Útlit er fyrir að vélarnar verði ekki teknar í notkun fyrr en fram eftir sumri og því ljóst að farþegar utan Schengen-svæðisins mega áfram búa sig undir langar biðraðir á vellinum.
