Tónlistarmaðurinn Ryan Adams hefur aflýst Evróputúr sínum sem átti að fara fram í haust. Skipuleggjendur tónleikaferðarinnar segja ákvörðunina rekja til „aðstæðna sem þeir ráða ekki við“, að því er fram kemur hjá The Daily Beast.
Miðahafar fá endurgreitt og jafnframt kemur fram að Adams haldi áfram vinnu við fyrirhugaðan þríleik hljóðplatna.
Skömmu eftir tilkynninguna staðfesti Adams sjálfur tíðindin á Instagram.
„Erfiðir tímar. Hef verið veikur. Hausttúrnum aflýst,“ skrifaði hinn 51 árs gamli tónlistarmaður.
Hann greindi jafnframt frá því að hann glími við Ménière-sjúkdóminn, sem getur valdið meðal annars svima, eyrnasuði og heyrnarskerðingu.
Nokkrum dögum áður birti Adams tilfinningaþrungna færslu þar sem hann sagði sig vera að selja persónulega muni til að ná endum saman. Meðal þess sem hann hefur sett á sölu eru gítarar, hljóðverabúnaður og Cadillac-bifreið.
„Ég er blankur, veikur, þreyttur og uppgefinn,“ skrifaði hann og bætti við að honum fyndist hann hafa „engin úrræði eftir“.
Þrátt fyrir erfiðleikana sagðist Adams enn hafa metnað til að halda áfram að semja tónlist og vonast til að geta snúið aftur á tónleikasviðið síðar.
Árið 2019 sökuðu nokkrar konur, þar á meðal fyrrverandi eiginkona hans Mandy Moore og tónlistarkonan Phoebe Bridgers, Adams um óviðeigandi hegðun. Í kjölfarið missti hann útgáfusamning, umboð og fyrirhugaðar plötuútgáfur.
Adams hafnaði upphaflega stórum hluta ásakananna en baðst síðar opinberlega afsökunar. Síðan þá hefur hann gefið út tónlist á eigin vegum og reynt að byggja feril sinn upp á ný. Á þessu ári kom út plata hans, The Suicide Handbook.
