Skipið Bandero, sem er í eigu Captain Paul Watson Foundation, er komið aftur á Íslandsmið til að halda áfram herferð sinni gegn atvinnuhvalveiðum á langreyðum við Ísland eftir stutta fjarveru vegna læknisfræðilegs neyðartilviks um borð.
Þetta kemur fram í fréttatilkynningu frá samtökunum.
Þar segir að skipið hafi fyrr í þessum mánuði yfirgefið íslenska lögsögu tímabundið eftir að áhafnarmeðlimur slasaðist og þurfti sérhæfða læknismeðferð á Írlandi. Samtökin segja að öryggi og velferð áhafnarinnar hafi verið sett í algjöran forgang og því hafi verið ákveðið að sigla til hafnar svo hinn slasaði gæti fengið viðeigandi meðferð.
Bandero er nú komið aftur til Íslands með Shannon Mann sem leiðtoga herferðarinnar. Markmiðið sé óbreytt, að binda enda á atvinnuhvalveiðar á Íslandi.
„Við erum hér til að binda enda á þetta ofbeldi á sjó. Ef fólk um allan heim gæti orðið vitni að þeirri hræðilegu þjáningu sem sprengiskutlarnir valda tel ég að alþjóðlegur þrýstingur yrði yfirgnæfandi til að stöðva þessa slátrun,“ er haft eftir Mann í tilkynningunni.
Segja veiðar hafa dregist saman
Samkvæmt samtökunum hafa alls 24 langreyðar verið veiddar það sem af er vertíðinni 2026. Til samanburðar hafi 52 langreyðar verið veiddar á sama tíma árið 2018 og 48 árið 2022.
Í tilkynningunni segir að slæmt veður hafi vissulega haft áhrif á veiðar Hvals hf. í sumar. Samtökin telja þó að fækkun veiddra hvala megi einnig rekja til nærveru Bandero á veiðisvæðunum.
Þau halda því fram að skip Hvals hf. hafi þurft að breyta veiðiaðferðum sínum, sigla lengra frá landi, dvelja lengur á hafi úti og snúa oftar til hafnar með færri veidda hvali en áður.
Captain Paul Watson Foundation segir að samtökin muni áfram beita lögmætum og friðsamlegum beinum aðgerðum í þeirri viðleitni að binda enda á atvinnuhvalveiðar við Ísland.
