Bandaríski söngvarinn Dylan Carter er látinn, aðeins 24 ára að aldri, eftir alvarlegt umferðarslys í Suður-Karólínu.

Samkvæmt upplýsingum frá lögreglu varð banaslysið seint á laugardagskvöld, um klukkan 23:42 að staðartíma, þegar einn bíll fór út af vegi í Colleton-sýslu.

Carter vakti athygli árið 2023 þegar hann tók þátt í 24. þáttaröð söngkeppninnar The Voice. Þar sló hann í gegn í áheyrnarprufum þegar hann flutti lagið I Look to You eftir Whitney Houston og voru allir dómarar þáttarins hrifnir af söng hans.

Í kjölfarið valdi hann sveitasöngkonuna Reba McEntire sem þjálfara sinn í keppninni. Carter hafði áður sagt að ástríða hans fyrir tónlist hefði kviknað snemma á ævinni og að áheyrnarprufan hefði verið tileinkuð móður hans, sem lést árið áður.

Carter ólst upp í bænum St. George í Suður-Karólínu, um 80 kílómetra frá Charleston. Andlát hans hefur vakið sorg meðal aðdáenda og þeirra sem fylgdust með ferli hans í tónlistarheiminum.