Lögreglan í Noregi mun vinna með frönskum yfirvöldum í rannsókn á háttsettum embættismanni, Mona Juul, og eiginmanni hennar, Terje Rød-Larsen, vegna gruns um spillingu í tengslum við samband þeirra við bandaríska kynferðisbrotamanninn Jeffrey Epstein.
Sérstakt sameiginlegt rannsóknarteymi hefur verið sett á laggirnar milli Økokrim og franskra yfirvalda. Í tilkynningu frá Økokrim segir að samstarfið snúist annars vegar um rannsókn á Juul og Rød-Larsen og hins vegar um mál sem sé til rannsóknar í Frakklandi, án þess þó að frekari upplýsingar séu gefnar.
Í Frakklandi hafa þegar verið hafnar nokkrar rannsóknir á mögulegum fjármálabrotum tengdum einstaklingum sem koma fyrir í svokölluðum Epstein-skjölum, þar á meðal á diplómatanum Fabrice Aidan.
Samkvæmt saksóknaranum Marianne Bender mun sameiginlega rannsóknarteymið auðvelda alþjóðlegt samstarf, þar sem ekki þurfi að senda formlegar beiðnir um upplýsingar í hvert skipti.
Norska lögreglan greindi frá því í febrúar að hafin hefði verið rannsókn á því hvort Juul hafi „þegið fríðindi í tengslum við starf sitt“. Hún starfaði áður í utanríkisráðuneyti Noregs og var síðar sendiherra í Bretlandi á sama tíma og hún og eiginmaður hennar voru í samskiptum við Epstein, samkvæmt gögnum sem fjölmiðlar hafa birt.
Samkvæmt norskum fjölmiðlum á Epstein að hafa arfleitt börn hjónanna að um 10 milljónum dala í erfðaskrá sinni. Epstein lést árið 2019 í fangelsi þar sem hann beið réttarhalda vegna mansals.
Juul og Rød-Larsen gegndu lykilhlutverki í leynilegum friðarviðræðum Ísraela og Palestínumanna sem leiddu til Óslóarsamninganna á tíunda áratugnum.
Rannsóknin beinist meðal annars að fjárhagslegum stuðningi sem hjónin fengu við kaup á íbúð í Osló árið 2018 undir markaðsverði, ferð til einkaeyju Epsteins árið 2011 og greiðslum fyrir heimahjúkrun fyrir Rød-Larsen.
Hjónin neita öllum sakargiftum.
