Bandarísk stjórnmálakona, Liz Conmy, og flugmaður létust þegar lítil flugvél hrapaði og sprakk í úthverfagarði skammt norðan við Minneapolis í morgun. Hún var á sextugasta og áttuna aldursári.

Flugvélin fórst skömmu eftir flugtak frá Crystal-flugvelli á laugardagsmorgni og skall til jarðar á grænu svæði í Brooklyn Park. Vitni segja að vélin hafi fallið til jarðar áður en hún sprakk í eldhafi.

Viðbragðsaðilar komu fljótt á vettvang en þegar þeir mættu logaði flakið og ekki tókst að bjarga þeim sem um borð voru.

Samkvæmt yfirvöldum var tilkynnt um slysið klukkan 11:51 að staðartíma. Lögregla staðfesti að vélin hefði hrapað skömmu eftir flugtak og að kviknað hafi í henni. Alríkisflugmálayfirvöld (FAA) sögðu tvo hafa verið um borð.

Rannsóknarnefnd samgönguslysa í Bandaríkjunum rannsakar nú slysið og mun senda sérfræðinga á vettvang.

Flokkur Conmy, Demókrataflokkurinn í Norður-Dakóta, staðfesti andlátið og lýsti henni sem öflugum talsmanni menntamála, umhverfisverndar og gagnsæis.

Ríkisstjóri Norður-Dakóta, Kelly Armstrong, sagði í yfirlýsingu að andlátið væri mikill missir fyrir ríkið og samfélagið, og vottaði fjölskyldu hennar og samstarfsfólki samúð.

Aðrir leiðtogar ríkisins tóku í sama streng og hrósuðu Conmy fyrir heilindi, samkennd og óbilandi vinnusemi í opinberu starfi.

Flugmaðurinn hefur ekki enn verið nafngreindur.