Starfsmenn Golfklúbbs Akureyrar mættu dapurlegri sjón í morgun þegar þeir komu út á Jaðarsvöll og sáu að verulegar skemmdir höfðu verið unnar á nokkrum flötum en greint er frá þessu á heimasíðu klúbbsins

Samkvæmt tilkynningu klúbbsins bendir allt til þess að vélhjól hafi verið notað til verksins en tækið hefur rifið upp flatirnar og skilið eftir djúp sár. Aðstæður á vellinum eru afar viðkvæmar um þessar mundir að sögn klúbbsins þar sem frost er að fara úr jörðu og mikil bleyta ríkir, þannig að slíkar skemmdir hafa sérstaklega alvarleg áhrif.

Klúbburinn telur líklegt að sami aðili standi á bak við þetta og skemmdir sem urðu á 14. flöt síðastliðið haust.

Klúbburinn vill ítreka að allur akstur vélknúinna ökutækja er stranglega bannaður á Jaðarsvelli. Lögreglunni hefur verið gert viðvart vegna málsins.

„Þetta er gífurlega svekkjandi að sjá, við vinnum sleitulaust hér við að koma vellinum í gegnum veturinn og svo fáum þetta eins og blauta tusku í andlitið. Þetta eru mestu skemmdir sem hafa verið unnar á vellinum í fjölmörg ár. Áskoranirnar eru nægar fyrir okkur að gera völlinn sem bestann og algjör synd að þurfa eiga við þetta. Við munum gera allt okkar til að komast til botns í þessu. Við erum að vinna úr okkar myndavélakerfi og munum afhenda það efni til lögreglu en óskum jafnframt eftir því að aðilinn gefi sig fram,“ sagði Steindór Kristinn Ragnarsson, framkvæmdastjóri GA, um málið.