Dómstóll í München í Þýskalandi hefur komist að þeirri niðurstöðu að sendibílstjóri sem stökk upp á bifreið eftir að hafa orðið skelfdur af hundum beri ekki ábyrgð á tjóni sem hlaust af atvikinu.

Atvikið átti sér stað í september árið 2024 í bænum Freising, norðan við München, þegar maðurinn var við afhendingu sendingar. Samkvæmt upplýsingum frá dómstólnum hlupu tveir dalmatíuhundar og einn blendingur út úr húsi viðkomandi eiganda. Viðbrögð sendibílstjórans voru að stökkva upp á vélarhlíf Porsche Cayenne-bifreiðar sem stóð fyrir utan húsið.

Eigandi bifreiðarinnar krafðist bóta að fjárhæð rúmlega 2.700 evrur vegna rispa og beyglna sem urðu á vélarhlífinni. Málið rataði fyrir dómstóla eftir að bæði sendibílstjórinn og vinnuveitandi hans neituðu að greiða fyrir viðgerðir.

Í úrskurði sínum taldi dómstóllinn ekki sannað að tjónið hefði einvörðungu orðið vegna athafna sendibílstjórans, meðal annars þar sem ljósmyndir af skemmdunum voru teknar nokkrum mánuðum eftir atvikið.

Þá benti dómurinn á að eigandi hundanna hefði borið ábyrgð á því að hafa þá í taumi eða undir stjórn, sérstaklega þar sem búast mátti við komu sendibílstjóra. Þrátt fyrir að hundarnir hafi samkvæmt vitnum ekki verið árásargjarnir, taldi dómstóllinn að gelt og hlaup í átt að manninum hefðu verið nægileg til að kalla fram eðlilegt flótta- eða varnarviðbragð.

Var því kröfu bifreiðareigandans hafnað.