Dánardómstóll í Lundúnum hefur komist að þeirri niðurstöðu að 30 ára sálfræðingur hafi tekið eigið líf eftir að hafa leitað á netinu að banvænu efni sem tengist svokölluðum „sjálfsvígspökkum“.

Konan, Zara Afua Ampong-Appiah, fannst látin í rúmi sínu árið 2025 eftir að hafa ítrekað leitað upplýsinga um efnið á netinu. Lögreglan í Bretlandi rannsakar nú að minnsta kosti fimm dauðsföll sem tengjast slíkum pökkum sem seldir eru frá útlöndum.

Við yfirheyrslur kom fram að Ampong-Appiah hefði átt efnilegan starfsferil fram undan og var framhaldsnemi í sálfræði við Royal Holloway, University of London. Frá febrúar 2023 hafði hún þó glímt við geðræna erfiðleika, fengið frí frá vinnu og verið á lyfjum vegna þunglyndis og kvíða.

Eftir andlátið skoðaði lögregla gögn úr raftækjum hennar og fann fjölda leita að bandarískri vefsíðu sem fjallar um sjálfsvíg og að efni sem oft er notað í slíkum „pökkum“. Móðir hennar, Elly Oppong, sagði dauða dóttur sinnar hafa „brotið hjarta sitt“ og að engin merki hefðu verið um hvað væri að gerast.

Málið er eitt af nokkrum sem lögreglan rannsakar, þar sem talið er að banvæn efni hafi verið pöntuð á netinu frá útlöndum. Í öðru máli kom fram að kona, 44 ára, hafi látist af völdum slíks efnis eftir að hafa fundist látin á heimili sínu á nýársdag 2025.

Ampong-Appiah starfaði sem sálfræðimeðferðaraðili hjá Talk Changes, þjónustu á vegum breska heilbrigðiskerfisins fyrir fólk með geðræn vandamál. Hún hafði þó sjálf leitað til læknis vegna kvíða og þunglyndis en neitað því að hún væri í sjálfsvígshugleiðingum.

Lögregla fann hana látna í íbúð sinni í austurhluta Lundúna í apríl 2025. Herbergið var læst innan frá en engin efni né sjálfsvígsbréf fundust á vettvangi. Hins vegar fundust fjölmargar netleitir tengdar sjálfsvígum og efninu í raftækjum hennar. Eiturefnapróf sýndu mjög há gildi tveggja efna í blóði hennar og taldi meinafræðingur að dauðsfallið stafaði af eitrun.

Móðir hennar gagnrýndi jafnframt að foreldrar fengju ekki upplýsingar um geðheilsu barna sinna þegar þau eru orðin lögráða og taldi slíkt geta skipt máli í forvörnum.

Áætlað er að hundruð dauðsfalla í Bretlandi tengist kaupum á svokölluðum sjálfsvígspökkum erlendis frá. Slík aðstoð við sjálfsvíg er ólögleg samkvæmt breskum lögum, þar á meðal að kaupa, flytja inn eða afhenda efni sem ætlað er til þess.

Málið tengist einnig rannsókn á kanadískum kokki, Kenneth Law, sem sakaður er um að hafa selt banvæn efni til fólks víða um heim. Hann hefur verið tengdur yfir hundrað sjálfsvígum og bíður nú réttarhalda.

Dánardómari í austurhluta London komst að þeirri niðurstöðu að Ampong-Appiah hefði tekið eigið líf, þar sem gögn sýndu skýrt að hún hefði neytt efnis sem leiddi til dauða hennar.