Reiði blossaði upp meðal Grindvíkinga og annarra eftir að fregnir bárust af því að ráðherrarnir Þorgerður Katrín, Inga Sæland og Kristrún Frostadóttir hefðu hist heima hjá Kristrúnu fyrr í apríl og fengið sér pítsu saman. Margir töldu þetta óheppilegt, sérstaklega í ljósi þess að Kristrún hafði verið beðin um að mæta á íbúafund í Grindavík sama dag.

Kristrún hafði boðað forföll á fundinn og samkvæmt henni tengdist kvöldverðurinn þeirri ákvörðun ekki.

Þorgerður Katrín birti mynd af samkomunni. Þar sjást hún sjálf, Kristrún og Inga. Með myndinni fylgdu skilaboðin: „Gleðilegt sumar, kæru landsmenn! Mættar í pizzupartý til Kristrúnar. Okkar besta forsætisráðherra.“

Inga Sæland svarar þessari gagnrýni í nýlegu viðtali við Frosta Logason.

„Ég hef bara í annan tíma ekki ímyndað mér neitt annað eins rugl og upphróp og falsfréttir… eins og maður sé kominn í stofufangelsi,“ sagði Inga og telur gagnrýnina ósanngjarna.

„Það er eins og hún eigi ekki börn… eins og hún sé bara ekki manneskja… þetta var svo ósanngjarnt. Þetta er bara svívirðilegt. Þetta er dónalegt og bara algjör yfirgangur. Ég var steinhissa á þessum viðbrögðum.“