Bandaríski leikarinn Dean Cain lék Superman í þáttunum „Lois & Clark: The New Adventures of Superman frá 1993 til 1997“. Þættirnir, um einn frægasta innflytjenda Bandaríkjanna, voru vinsælir á sínum tíma og hlutu margar tilnefningar og verðlaun.
Í viðtali við Fox News á miðvikudaginn sagði Dean Cain að hann væri að gang í útlendingaeftirlit Bandaríkjanna, oftast kallað ICE. Stofnunin hefur verið umdeild undanfarið vegna gríðarlegar aukningar í brottvísunaraðgerðum.
Dean Cain hefur haldið áfram að leika í þáttum og myndum en hann segist einnig vera forfallalögregluþjónn. Hann deildi myndbandi á samfélagsmiðla sem var hans umsókn til ICE og fékk myndbandið mikla athygli. Hann hvetur nú fylgjendur sína og almenning til að gera hið sama og ganga til liðs við ICE.
Í yfirlýsingu sagði bandaríska öryggisráðuneytið (DHS) að Cain yrði vígður sem heiðursfulltrúi ICE á næstu vikum. „Superman hvetur Bandaríkjamenn til að verða ofurhetjur í raunveruleikanum með því að bregðast við kalli þjóðarinnar um að ganga til liðs við hugrökku konurnar og karlana hjá ICE, sem vinna að því að vernda samfélög okkar og handtaka þau allra verstu,“ sagði Tricia McLaughlin, aðstoðarráðuneytisstjóri DHS.
„Fólk þarf að stíga fram. Ég er að stíga fram. Vonandi mun fullt af fyrrum lögreglumönnum og ICE starfsfólki gera það sama, og þá náum við markmiðunum strax og getum hjálpað til við að vernda þetta land,“ sagði Cain í viðtali við Fox News.
Trump segist vilja að brottvísanir útlendinga nái upp í eina milljón manns á hverju ári. Til þess að markmið hans geti orðið raunverulegt þarf ICE mun fleira starfsfólk. ICE hefur því beitt fjölbreyttum ráðningaraðferðum og auglýsingaherferðum í von um að ráða 10 þúsund starfsmenn í viðbót. Meðal auglýsinganna hafa sést veggspjöld sem minna á áróður frá seinni heimsstyrjöld.
Í kjölfar tilskipana frá ríkisstjórn Trumps hefur ICE þegar handtekið tugi þúsunda af innflytjendum í Bandaríkjunum og vísað þeim úr landi. Aðgerðirnar eru oft á tíðum nokkuð grimmar og hafa náð til hversdagslega borgara sem eru að sækja um ríkisborgararétt, algjörlega löglega. Eftir að fólk er handtekið er það sent í vissar fangabúðir án réttarhalda.
„Þetta er það sem ég kaus, og [Trump] ætlar að sjá til þess að það rætist, og ég mun leggja mitt af mörkum og hjálpa til við að tryggja að það gerist,“ sagði Dean Cain í viðtalinu við Fox News.
