Ekkja fyrrverandi slökkviliðsstjórans Corey Comperatore, sem lét lífið í misheppnaðri morðtilraun á Donald Trump í Butler í Pennsylvaníu árið 2024, segist sannfærð um að víðtækt samsæri hafi legið að baki árásinni.
Helen Comperatore ræddi málið í viðtali við NewsNation og sagði að hún teldi stjórnvöld hafa átt einhvern þátt í atburðinum.
„Ég trúi því að þetta hafi verið innanbúðarverk, einhvers staðar innan stjórnkerfisins,“ sagði hún. Þegar hún var spurð hvort hún teldi að um pólitískt samsæri hefði verið að ræða svaraði hún: „Já, algjörlega.“
Viðmælandinn spurði hvort hún hefði séð einhver gögn sem bentu til víðtækara samsæris. Hún kvaðst ekki geta lagt fram sönnunargögn en sagðist hafa fengið upplýsingar sem hefðu styrkt grun sinn.
„Mér hefur verið sagt ýmislegt. Svo gerðist eitthvað hjá mér skömmu eftir árásina og þegar maður fer að púsla þessu saman þá meikar þetta allt fullkominn sens,“ sagði hún.
Helen segist einnig sannfærð um að árásarmaðurinn, hinn tvítugi Thomas Crooks, hafi ekki staðið einn að verki heldur verið hluti af stærra pólitísku samsæri sem hefði það markmið að ráða Donald Trump af dögum. Hún nefndi þó enga einstaklinga eða hópa sem hún teldi bera ábyrgð.
Engin staðfest gögn hafa hins vegar komið fram sem styðja fullyrðingar um samsæri að baki árásinni.
Í viðtalinu skoraði hún á Trump forseta að taka rannsókn málsins sjálfur í sínar hendur og sagði að hún myndi ekki finna frið fyrr en þeir sem bæru ábyrgð yrðu dregnir til ábyrgðar.
„Ekki gleyma okkur. Mundu hvað við gengum í gegnum þennan dag. Við erum enn hér og þurfum svör,“ sagði hún og lýsti þeim skilaboðum sem hún myndi senda forsetanum.
Nú eru tvö ár liðin frá því að byssukúla strauk eyra Donalds Trump á kosningafundi í Butler. Corey Comperatore varð fyrir skoti og lést þegar hann reyndi að verja fjölskyldu sína. Árásarmaðurinn, Thomas Crooks, var skotinn til bana af öryggissveitum á vettvangi.
Þrátt fyrir umfangsmikla rannsókn hefur enn ekki tekist að skýra hver hvati Crooks var. Hann skildi hvorki eftir sig stefnuyfirlýsingu né aðra skýringu á verknaðinum og takmörkuð umsvif hans á netinu hafa gert rannsóknina erfiðari.
Í nýrri skýrslu eftirlitsaðila stjórnvalda kemur fram að meginskýring mistakanna hafi verið alvarlegir annmarkar í vinnubrögðum bandarísku leyniþjónustunnar. Samkvæmt skýrslunni bárust stofnuninni aldrei 102 tilkynningar sem sendar voru í gegnum talstöðvakerfi lögreglu um grunsamlegan mann sem síðar reyndist vera Crooks.
Helen Comperatore segir óskiljanlegt að ekki hafi verið brugðist við strax.
„Af hverju? Af hverju hefði ekki átt að bregðast við eftir fyrstu tilkynninguna? Ef þeir hefðu einfaldlega haldið Trump frá sviðinu væri ég ekki hér að ræða þetta í dag,“ sagði hún.
Hún gagnrýndi jafnframt leyniþjónustuna harðlega og sagði stofnunina hafa brugðist á öllum stigum.
„Þeir gerðu allt vitlaust. Þeir hlustuðu ekki á talstöðvarnar og samskiptin voru engin,“ sagði hún.
Ekkjan sagði einnig að enginn frá leyniþjónustunni hefði haft samband við hana fyrr en sumarið 2025, tæpu ári eftir árásina, og að hún hefði enn ekki fengið fullnægjandi svör við spurningum sínum.
