Ríflega tíu dularfullra dauðsfalla og hvarfa háttsettra vísindamanna víðs vegar um Bandaríkin vekur athygli og einn sérfræðingur telur að einstaklingarnir hafi verið skotmörk vegna þekkingar sinnar eða þeir neyddir til að hverfa til að vernda sjálfa sig.
Að minnsta kosti 11 manns hafa annaðhvort látist eða horfið síðan 2022, en langflestir þeirra tóku þátt í rannsóknum á kjarnorkuvísindum og geimnum, og sumir tengdust rannsóknum á fljúgandi furðuhlutum.
Michael David Hicks, 59 ára, Frank Maiwald, 61 árs, Nuno Loureiro, 47 ára, Jason Thomas, 45 ára, Amy Eskridge, 34 ára, og Carl Grillmair, 47 ára, létust öll á árunum 2023 til 2026 og gegndi hver og einn lykilhlutverki í mikilvægum vísindarannsóknum.
Á meðan dánarorsök Hicks og Maiwald er enn ókunn var Grillmair skotinn til bana fyrir utan heimili sitt þann 16. febrúar 2026. Freddy Snyder, 29 ára, var ákærður fyrir morðið á honum.
Loureiro var einnig skotinn á heimili sínu í Massachusetts og lést af sárum sínum degi síðar, þann 15. desember 2025. Dauði hans var tengdur við aðra skotárás í Brown-háskóla.
Lík Thomas, aðstoðarforstjóra lífefnafræði hjá lyfjafyrirtækinu Novartis, fannst í Quannapowitt-vatni í Massachusetts, þremur mánuðum eftir að hann sást síðast ganga frá heimili sínu seint um kvöld.
Eskridge, rannsakandi með aðsetur í Huntsville í Alabama, lést 11. júní 2022 af völdum skotsárs sem hún veitti sér sjálf.
Monica Reza, 60 ára, Melissa Casias, 53 ára, Anthony Chavez, 79 ára, Steven Garcia, 48 ára, og William Neil McCasland, 68 ára, hershöfðingi á eftirlaunum úr flughernum, hafa öll horfið á árunum 2023 til 2026 og átti hvert hvarf sér stað við grunsamlegar aðstæður.
Sumir vísindamenn hurfu af heimilum sínum en aðrir hurfu á gönguleiðum og öðrum opinberum svæðum.
Þó að einstaklingarnir virðist ekki tengjast í gegnum vinnu sína og rannsóknir bendir einn sérfræðingur á þann möguleika að eitthvað illviljaðra gæti verið á seyði.
„Hvarf sumra þessara einstaklinga gæti verið vegna þess að það eru einhverjar trúnaðarrannsóknir í gangi á mjög háu stigi á alríkisvísu, þar sem ákveðið fólk gæti annaðhvort verið tekið vegna þess að það veit of mikið eða látið sig hverfa vegna þess að það er auðlind sem hægt væri að yfirheyra eða jafnvel ákæra fyrir ýmsa glæpi,“ sagði dr. Steven Greer, furðuhlutafræðingur og læknir á eftirlaunum, við Fox News Digital.
Greer bendir einnig á þann möguleika að vísindamennirnir hafi verið skotmark alþjóðlegra glæpasamtaka sem vilja halda rannsóknum þeirra frá almenningi.
„Í ákveðnum mikilvægum deildum á alríkisvísu hefur verið komist að þeirri niðurstöðu að prógrömmin hafi tengst rannsóknum og þróun á fljúgandi furðuhlutum og óþekktum loftfyrirbærum, og hafi verið starfræktar sem glæpasamtök,“ sagði Greer.
Til að bregðast við athygli almennings á málinu hefur Donald Trump forseti heitið því að rannsaka hin dularfullu mannshvörf og dauðsföll hinna ýmsu vísindamanna.
„Ég vona að þetta sé tilviljun, en við munum vita það eftir eina og hálfa viku,“ sagði Trump við fréttamenn á fimmtudag. „Ég var að koma af fundi um það efni.“
Að auki sagði Kjarnorkuöryggisstofnun Bandaríkjanna (NNSA) áður við Fox News Digital að hún væri að skoða málin.
„NNSA er kunnugt um fregnir sem tengjast starfsmönnum rannsóknarstofa okkar, verksmiðja og starfsstöðva og er að kanna málið.“
Í ljósi þess hve þétt atvikin eru í tíma telur Greer að alríkisstjórnin þurfi að grípa inn í til að veita uppljóstrurum meiri vernd á meðan unnið er að því að finna orsök hinna ýmsu dularfullu dauðsfalla og hvarfa.
„Þetta er mjög alvarlegt mál,“ sagði Greer við Fox News Digital. „Jafnvel þótt það hljómi eins og James Bond-kvikmynd er þetta ekkert grín. Við höfum mjög hugdjarft og þjóðrækið fólk sem hefur reynt að stíga fram, en bandarísk stjórnvöld hafa að mínu mati brugðist því með því að veita ekki fullnægjandi vernd.“
