Lögreglan í Bretlandi greindi frá því á þriðjudag að unglingspiltur hafi verið ákærður fyrir íkveikju í tengslum við nýjustu árás í röð árása sem beinst hafa að stofnunun tengdum gyðingum í London.
Atvikið átti sér stað seint á laugardagskvöldi þegar flösku, sem innihélt eldfimt efni, var kastað inn um glugga Kenton United Synagogue í Harrow, í norðvesturhluta borgarinnar. Samkvæmt upplýsingum frá lögreglu sást reykur inni í byggingunni, en engin meiðsl urðu á fólki.
Myndbandsupptaka sem birt var á netinu sýnir einstakling í dökkum klæðnaði kveikja í flöskunni áður en henni er kastað inn um gluggann.
Tveir ungir menn, 17 og 19 ára, voru handteknir í tengslum við málið. Sá yngri hefur nú verið ákærður fyrir íkveikju sem ekki stofnaði lífi í hættu og átti að mæta fyrir dóm síðar sama dag. Hinn, 19 ára gamli, hefur verið látinn laus á meðan rannsókn málsins heldur áfram.
Að sögn aðstoðarlögreglustjórans Matt Jukes hafa alls 15 einstaklingar verið handteknir vegna sex svipaðra atvika undanfarna mánuði. Þar á meðal er árás þar sem logandi hlut var kastað að skrifstofum fjölmiðilsins Iran International, sem er gagnrýninn á stjórnvöld í Íran.
Lögreglan í London rannsakar nú hvort árásirnar kunni að tengjast aðilum sem starfa í umboði Írans. Þá hefur æðsti rabbíni Bretlands varað við því sem hann kallar „viðvarandi herferð ofbeldis og ógnana“ gegn gyðingum í landinu.
