Dýraverndarsamband Íslands (DÍS) mótmælir harðlega enduruppteknum hvalveiðum Hvals hf. og kallar eftir tafarlausri stöðvun þeirra. Sambandið lýsir veiðunum sem ómannúðlegum, tilgangslausum og skýru broti á lögum um dýravelferð.

Fyrsta langreyðurin í tvö ár var dregin að landi í Hvalstöðinni í Hvalfirði í nótt, þegar hvalveiðibáturinn Hvalur 9 sneri til hafnar með tvö dýr. Endurkoma hvalveiða hefur mætt harðri andstöðu Dýraverndarsambands Íslands (DÍS), sem hefur sent frá sér yfirlýsingu þar sem veiðunum er mótmælt harðlega.

Skortur á viðskiptalegum tilgangi

Samtökin benda á að veiðarnar séu með öllu tilgangslausar út frá viðskiptahagsmunum. Enn séu til miklar birgðir af hvalkjöti í frystigeymslum sem enginn markaður sé fyrir, þrátt fyrir tveggja ára hlé á veiðum. DÍS varpar upp þeirri spurningu hvað raunverulega vaki fyrir Kristjáni Loftssyni, aðaleiganda Hvals hf., þar sem reksturinn sé fjárhagslegt tapverkefni. Hvetja samtökin fjölmiðla til að rannsaka hvort pólitískir hagsmunir liggi að baki, svo sem að hafa áhrif á fyrirhugaða löggjöf eða þjóðaratkvæðagreiðslu um ESB-aðildarviðræður.

Telja veiðarnar brjóta á dýravelferð

Í yfirlýsingunni er vísað í niðurstöðu fagráðs um velferð dýra frá júní 2023, þar sem fram kom að veiðar á langreyðum stæðust vart lög og að engin þekkt leið væri til að deyða dýrin á mannúðlegan hátt. Þá gagnrýnir DÍS niðurstöðu Umboðsmanns Alþingis og segir óásættanlegt að atvinnufrelsi hvalveiðifyrirtækisins hafi verið metið þýðingarmeira en lög um velferð dýra.

DÍS styðst jafnframt við eftirlit Matvælastofnunar (MAST) frá árunum 2022 og 2023 máli sínu til stuðnings. Þar kom fram að:

• Það tók allt að tvær klukkustundir að deyða dýr.
• Skotið var mörgum sprengiskutlum í dýrin vegna slæmrar hittni skytta.
• Helsærð dýr syntu á brott og hurfu.
• Ófæddir kálfar fundust þegar magi kvendýra var skorinn upp.

Skora á stjórnvöld að grípa inn í

Dýraverndarsambandið lýsir hvalveiðum sem villimannslegum og ónauðsynlegum. Skora samtökin opinberlega á íslensk stjórnvöld að binda endi á þessar veiðar hið allra fyrsta og tryggja að lögum um dýravelferð sé framfylgt.

Hér má lesa yfirlýsinguna í heild sinni:

„Fyrsta langreyðurin sem veidd er við Ísland í tvö ár var dregin upp í Hvalstöðina í Hvalfirði um klukkan fjögur í nótt þegar Hvalur 9 kom í nótt með tvær langreyðar að landi.

Dýraverndarsamband Íslands (DÍS) mótmælir harðlega þessum veiðum sem eru ómannúðlegar og með öllu tilgangslausar út frá viðskiptahagsmunum Hvals hf og aðaleiganda þess Kristjáns Loftssonar. Þrátt fyrir að engar hvalveiðar hafi verið stundaðar í tvö ár, og þær þar áður verið takmarkaðar, eru enn birgðir af hvalkjöti í frystigeymslum sem enginn markaður er fyrir.

Stóra spurningin er sú hvað raunverulega vakir fyrir Kristjáni Loftssyni úr því að hann tapar aðeins fjárhagslega á veiðunum? Er það að hindra lýðræðislega kjörin stjórnvöld í því að setja lög á hvalveiðar í haust og/eða að hafa áhrif á þjóðaratkvæðagreiðslu um framhald aðildarviðræðna við Evrópusambandið seinnipartinn í ágúst í ljósi þess að Evrópusambandið bannar hvalveiðar? DÍS hvetur fjölmiðla til að leita svara við þessu.

Fagráð um velferð dýra komst að þeirri niðurstöðu þann 16. júní 2023 að veiðar á langreyðum, næst stærstu dýrum jarðar á eftir steypireyðum, stæðust vart lög um velferð dýra og að engin þekkt leið væri til að drepa þessi risavöxnu spendýr á mannúðlegan hátt. Frelsi Kristjáns Loftssonar til að halda úti þessu úrelta áhugamáli sínu var í framhaldinu, af Umboðsmanni Alþingis, metið þýðingarmeira en lög um velferð dýra. Við þetta verður ekki unað.

Sýnt hefur verið fram á, með eftirliti MAST árin 2022 og 2023, að hvalveiðar eru eitt augljósasta brot á lögum um dýravelferð sem hugsast getur. Það tók allt að tvær klukkustundir að deyða langreyði eftir að þremur sprengiskutlum, hver með 4 kg dýnamíthleðslu, hafði verið skotið í dýrið. Skyttur hittu dýrin illa. Í einhverjum tilfellum syntu helsærð dýr á brott og hurfu eftir að hafa verið skotin margsinnis og í öðrum tilvikum birtust kálfar þegar magi kvendýra var skorin upp á planinu í Hvalstöðinni.

Þessu verður ekki lýst öðruvísi en sem villimannslegum veiðum sem eiga sér enga stoð í nútímanum. Dýraverndarsamband Íslands hvetur íslensk stjörnvöld til að binda endi á þessar ónauðsynlegu og ómannúðlegu veiðar hið allra fyrsta.“