„Þarna munum við að fara yfir mikilvæg skref til þess að hámarka árangur í markmiðasetningu,“ segir Erla en hún og Þóra eru konurnar á bak við MUNUM dagbækurnar.
Við fengum Erlu og Þóru til að gefa lesendum ráðleggingar hvað varðar markmiðasetningu en þær mæla eindregið með að fólk setji sér markmið reglulega.
„Rannsóknir hafa sýnt það að fólk sem setur sér skýr markmið nær meiri árangri í lífinu. Þeir sem ná langt á sínu sviði eru sjaldnast komnir þangað fyrir einskæra tilviljun, oftast liggur þrotlaus vinna og mjög skýr markmiðasetning þar að baki. Ef við höfum skýr markmið þá erum við búin að marka okkur stefnu sem við vinnum eftir. Ef við höfum engin markmið er hætt við því að við villumst af leið og vitum ef til vill ekki hvert okkur langar að stefna,“ segir Erla. „Þess vegna er mikilvægt að fylgja ákveðnum skrefum í markmiðasetningu til þess að auka líkur á árangri.“
Gerðu „bucket“ lista
Áður en við byrjum að skrifa niður markmið okkar getur verið gott að gefa sér góðan tíma til að hugsa um það hvað það er sem maður virkilega vill gera í lífinu, áfangar sem maður vill ná og hlutir sem manni langar að framkvæma. Til dæmis getur verið góð leið að byrja að skrifa svokallaðan „bucket“ lista sem inniheldur 100 atriði sem manni langar að upplifa og framkvæma yfir ævina. Í amstri dagsins gefum við okkur sjaldan rými til þess að hugsa á þennan hátt og margir eru sífellt að fresta draumum sínum þar til hið fullkomna augnablik kemur, en svo bara kemur það ekki og þess vegna verðum við að búa það til. Þegar við erum komin með svona lista þá höfum við góðan leiðarvísi sem við getum síðan unnið áfram með og byrjað að forgangsraða og setja markmiðin upp í rétt skref.
Sértæk og nákvæm markmið
Það fyrsta sem þarf að hafa í huga er að markmið séu sértæk og nákvæm. Til dæmis er markmiðið: „ég ætla að sinna vinum mínum betur“ frekar óljóst markmið sem erfitt getur verið að árangursmæla. Hins vegar ef við tökum markmiðið lengra og gerum það mælanlegt og nákvæmt er mun auðveldara að fylgja því eftir. Til dæmis mætti umorða þetta markmið og segja: „Ég ætla að sinna vinum mínum betur með því að hringja allavega einu sinni í viku í þá, hitta þá að minnsta kosti tvisvar sinnum í mánuði og bjóða í mat fjórum sinnum á árinu“. Þarna erum við komin með mun skýrara markmið sem auðveldara er að fylgja eftir.
Skrifaðu niður á blað
Þegar við skrifum niður markmiðin okkar er líklegra að við náum þeim. Þau verða raunverulegri fyrir okkur og það verður einhver mögnuð tenging sem á sér stað þegar við skrifum markmið, hugsanir og drauma niður á blað. Það er ekki sama tenging sem á sér stað þegar við skrifum eitthvað inn í tölvuna. Það sem við handskrifum festist betur í minni okkar.
Mikilvægt að búta markmiðin niður
Ef þú setur þér stór markmiðið getur verið gott að skipta því niður í nokkur minni markmið sem eru viðráðanlegri. Með þessu móti er líklegra að þú gefist ekki upp. Ef þú villt hlaupa maraþon næsta sumar getur markmið fyrir janúarmánuð til dæmis verið að ná að hlaupa 10 kílómetra í febrúar, svo 20 kílómetra í mars og koll af kolli.
Líttu til baka og endurskoðaðu
Ein ástæða þess að mörg markmið renna í sandinn er líklega sú að markmiðin eru of víðtæk og jafnvel óraunhæf. Einnig er líklegt að hluti ástæðunnar liggi í því að fólk er ekki að endurskoða markmiðin sín reglubundið og fylgjast með árangri. Markmiðin eru gjarnan sett á áramótum en eru svo ekki skoðuð aftur fyrr en um næstu áramót. Við leggjum til að endurskoða markmiðin að minnsta kosti ársfjórðungslega
Ekki gleyma að verðlauna þig
Og það sem er mögulega það allra mikilvægast: að verðlauna sjálfan sig fyrir góðan árangur. Við eigum það flest til að vilja alltaf ná aðeins lengra, gera aðeins meira og gleymum þá að staldra við og klappa okkur á bakið og njóta þess árangurs sem við höfum náð. Það getur verið sniðugt að ákveða fyrirfram hvernig við ætlum að verðlauna okkur þegar við náum markmiði. Slík gulrót getur verið hvetjandi í ferðalaginu sjálfu.
Mynd / Anni Viskus
Athugasemdir