Héraðsdómur Vestfjarða dæmdi þann 1. apríl karlmann í tveggja mánaða skilorðsbundiö fangelsi fyrir ofbeldisbrot í nánu sambandi. Maðurinn var ákærður 16. ágúst í fyrra fyrir að hafa „á alvarlegan hátt ógnað lífi, heilsu og velferð sambýliskonu sinnar,“ og var þess krafist að ákærði yrði dæmdur til refsingar og greiðslu alls sakarkostnaðar.
Í ákæru kemur fram að maðurinn hafi slegið konuna „með flötum lófa í andlit og kýla hana með krepptum hnefa í andlit, sem varð til þess að hún féll aftur fyrir sig í gólfið […], og í kjölfar þess dregið hana eftir gólfi herbergisins, með því að halda um hendur hennar, en afleiðingar árásarinnar voru þær að hún hlaut mikið mar og nokkrar kúlur á stóru svæði á andliti vinstra megin, glóðarauga vinstra megin, bólgu og skekkju á nefi (septum deviation), lítinn skurð (um 1 cm) við vinstriaugabrún, og skurð hægra megin við hársvörð (um 2 cm).“
Játaði sök fyrir dómi
Maðurinn sem hefur ekki áður sætt refsingu, játaði sök skýlaust fyrir dómi.Við ákvörðun refsingar var litið til þess að maðurinn hefði játað sök, verið samvinnuþýður og veitt liðsinni við rannsókn málsins. Þótti hæfileg refsing vera tveir mánuðir í fangelsi, en dómurinn er skilorðsbundinn til tveggja ára. Manninum var einnig gert að greiða sakarkostnað málsins, tæplega 230 þúsund krónur.
Athugasemdir