Enn halda kettir áfram að hverfa á undarlegan hátt við miðborg Reykjavíkur.
Kötturinn Elvis er aftur týndur, en eigandi hans tónlistarmaðurinn Böðvar Reynisson, oftast kallaður Böddi Reynis og kenndur við hljómsveitina Dalton er nýbúinn að fagna heimkomu Elvis, þá hverfur hann aftur.
Auglýst er eftir kettinum í Facebook hópinum Kattavaktin. Elvis er búsettur í Samtúni og er nú týndur í annað skiptið á skömmum tíma, þrátt fyrir að fara aldrei út nema í stutta stund í senn.
Elvis hvarf seinast 12. febrúar og var þá týndur í þrjár vikur. Fyrir mikinn mildi fannst Elvis, en þá var hann staddur í Kópavogi með ól af öðrum ketti. Kattarólin sem var á Elvis var af ketti sem býr á Rauðarástíg og hvarf sama dag og Elvis.
Þegar Elvis fannst var hann horaður, skítugur og skelkaður og segir Böddi hvarfið hafa verið hreint og klárt illviljaverk.
Þykir nokkuð ljóst að einhver óprúttinn aðili sé að verki, en íbúar í Norðurmýri hafa lýst yfir áhyggjum sínum á að dýraníðingur sé í hverfinu.
Mannlíf greindi sömuleiðis frá því er Hafsteinn, íbúi í Norðurmýri, sagði frá svartklæddum manni sem hrifsaði kött Hafsteins og hljóp með hann á brott:
„Ég finn mig knúinn til láta nágranna vita af atviki sem átti sér stað í morgun á Skeggjagötu. Um kl. 10 í morgun varð ég vitni að svartklæddum manni hrifsa til sín köttinn minn og hlaupa með hann í átt að Snorrabraut. Það var fyrir algera tilviljun að ég varð vitni að þessu,“ segir Hafsteinn og bætir við:
„Eftir að hafa hlupið á eftir honum dágóðan spöl þá sleppti hann kettinum blessunarlega og ber kisi sig vel. Þessi maður er víst íbúi á Gistiheimili á Flókagötu. Það var augljóst að maðurinn var ekki dýravinur og vildi ég því láta nágranna vita og biðja ykkur um að huga vel að kisunum ykkar.“
Sjá einnig: Óhugnanleg ráðgáta í Norðurmýrinni – Kettirnir hverfa – „Ég fer með mína í beisli út í garð“
Mikill óhugur er meðal kattareigenda hverfisins og óttast þeir að sinn köttur gæti verið næsta fórnarlamb kattaþjófsins.
Athugasemdir