Jóhann Berg ósáttur við KSÍ og dró sig úr landsliðshópnum

Jóhann Berg Guð­munds­son, kant­maður enska knatt­spyrnu­liðs­ins Burnley og leik­maður íslenska lands­liðs­ins gefur ekki kost á sér í næstu verk­efni lands­liðs­ins. Ástæðuna segir hann vera tví­þætta.

Í við­tali við 433.is í dag seg­ist Jóhann Berg vera tæpur í nára. „Ég ákvað að draga mig úr hópnum þar sem ég er tæpur í nár­anum eftir leik­inn með Burnley um helg­ina.“ Lék hann 30 mín­útur í jafn­tefli gegn Norwich á laug­ar­dag­inn.

Fregnir af meiðslum Jóhanns Berg er enn eitt áfallið fyrir Arnar Þór Við­ars­son, þjálf­ara lands­liðs­ins þar sem lyk­il­menn hafa verið að detta úr lið­inu, einn af öðrum frá því að Arnar tók við lið­inu. Ástæð­urnar eru ýmsar hjá leik­mönn­unum.

Jóhann Berg hefur verið einn besti leik­maður lands­liðs­ins síð­ustu ár en hann hefur spilað 81 lands­leik og skorað í þeim 8 mörk. Segir í frétt 433.is að hann hafi oft mætt í leiki lands­liðs­ins tæpur eða ein­fald­lega meiddur.

„Ég hef oft fórnað ýmsu fyrir lands­liðið, enda hef ég alltaf litið á það sem mik­inn heiður að spila fyrir þjóð mína. Ég hef þar af leið­andi oft lagt mikið á mig og jafn­vel fórnað lík­am­legu ástandi mínu hjá félags­liði fyrir lands­liðið,“ sagði Jóhann við 433.is.

KSÍ hefur und­an­farnar vikur staðið í ströngu vegna ásak­ana um þöggun í tengslum við meint kyn­ferð­is­brot nokk­urra leik­manna liðs­ins. Eftir að málin komust upp á yfir­borðið fór stjórn KSÍ að hafa afskipti af vali á leik­mönnum liðs­ins. Fór svo að lokum að stjórn KSÍ sagði af sér en núver­andi stjórn KSÍ virð­ist ætla að skipa sér af vali leik­manna fyrir verk­efni lands­liðs­ins en nýlega var til­kynnt að Aron Einar Gunn­ars­son, fyr­ir­liði lands­liðs­ins til margra ára, hafi ekki verið val­inn í hóp­inn sem mætir Armeníu og Liechtenstein í okt­o­ber. „Ég get alveg við­ur­kennt að það hafði áhrif á ákvörðun mína í þetta sinn að ég hef ekki verið fylli­lega sáttur við vinnu­brögð sam­bands­ins unda­farin miss­eri,“ sagði Jóhann um stöð­una sem upp er komin, í við­tal­inu við 433.is.

Þá seg­ist Jóhann Berg vilja vera í sem besta formi í leikjum Burnley í vetur en liðið er nú í fall­sæti i ensku Úrvals­deild­inni eftir 7 umferðir.