Knattspyrnufélag Reykjavíkur, KR, minnist í dag Elínar Helgadóttur, mikillar KR-konu, sem jarðsett var í dag. Með hlýjum minningarorðum var hennar minnst á síðu stuðningsmanna á Facebook þar sem allir eru kvattir til að minnast hennar með framlagi í minningar- og framtíðarsjóð félagsins, sem Elín stýrði einmitt lengi vel.
Elín, sem alltaf var kölluð Ella, ólst upp í Reykjavík þar sem hún bjó meðal annars á Laufásvegi. Stærstan hluta vinnuferilsins vann hún að leikskólamálum hjá Reykjavíkurborg, þar á meðal við innritun á dagvistun barna. Hún tók einnig þátt í að stofna sælgætisverksmiðjuna Júmbó með systkinum sínum og föður.
Ella var mikil íþróttamanneskja og stundaði bæði handbolta og frjálsar, en spretthlaup var þar hennar sterkasta grein. Hún spilaði allan sinn handboltaferil með KR við góðan orðstír og náði því afreki að vera í fyrsta kvennalandsliði Íslands í handbolta. Eftir íþróttaferilinn vann hún svo ötullega að ýmsum málefnum innan KR en hún var meðal annars fyrst kvenna til að sitja þar í aðalstjórn auk þess sem hún tók þátt í stofnun KR-kvenna, Íþróttaskóla barnanna og skokkhóps KR. Hún var ötull talsmaður kvenna í íþróttum innan sem utan KR en hún sat um tíð í landsliðsnefnd kvenna. Ella studdi félagið sitt í leik og starfi til æviloka.
KR-ingar fara um Elínu hlýjum orðum í dag þar sem þeir segja hana hafa verið frábæra konu:
„Elín Helgadóttir KR-kona verður jarðsett í dag. Ella var mikill KR-ingur, landsliðskona í handbolta, ein af stofnendum KR-kvenna, sat í aðalstjórn KR og svo mætti lengi telja. Ella var alla tíð vakin og sofin yfir málefnum og hagsmunum KR og stýrði m.a. lengi vel minningarsjóði KR sem er grunnurinn að Framtíðarsjóði KR. Við minnum KR-inga sem vilja minnast hennar á að framtíðarsjóðurinn mun senda aðstandendum þakkar- og minningarskjal um Ellu með nöfnum þeirra sem minnast hennar með framlagi í sjóðinn.“
Athugasemdir