Hertar aðgerðir stjórnvalda: Viðburðir með hraðprófum bannaðir og tíu mega koma saman

Tíu mega koma saman, við­burðir með hrað­prófum verða ekki leyfi­legir og skemmti­staðir loka. Þessar hertu aðgerðir eru meðal þeirra sem rík­is­stjórnin sam­þykkti á fundi í dag, eftir að heil­brigð­is­ráð­herra hafði fengið minn­is­blað með til­lögum frá sótt­varna­lækni.

Willum Þór Þórsson, heil­brigð­is­ráð­herra, og Katrín Jak­obs­dóttir, for­sæt­is­ráð­herra, kynntu hertar aðgerðir í sam­tali við RÚV að loknum rík­is­stjórn­ar­fundi í ráð­herra­bú­staðnum á Tjarn­ar­götu.

Sam­komu­tak­mark­anir munu nú mið­ast við 10 manns í stað 20, eins og verið hefur und­an­farið. Spila­stöðum og skemmti­stöðum sem eru ekki veit­inga­staðir verður lokað. Við­burðir sem fleiri geta sótt að und­an­gengnum hrað­prófum verða ekki leyfi­legir næstu vik­urnar.

Til að koma til móts við rekstr­ar­að­ila veit­inga­húsa verður gjald­dögum skatta og trygg­ing­ar­gjalda frestað fyrir þá. Auk þess verða nýjar aðgerðir und­ir­búnar sem eiga að koma til móts við ferða­þjón­ustu og við­burða­hald­ara.

Willum Þór sagði ákvörð­un­ina ákveð­inn milli­veg. Tveir aðrir mögu­leikar hefðu verið í stöð­unni. Annar þeirra var að halda aðgerðum óbreyttum og hinn að ganga enn lengra og fara í ein­hvers konar lok­anir. Þessi milli­vegur hafi hins­vegar verið val­inn. Ekki hafi þótt fýsi­legt að halda aðgerðum óbreyttum vegna þess hve miklu álagi það myndi valda á Land­spít­al­anum. Þar er ástandið þegar slæmt og álagið gríð­ar­legt vegna fjölda smita og inn­lagna.

Þegar for­sæt­is­ráð­herra og heil­brigð­is­ráð­herra voru spurð hvort ekki væri sér­stakt að grípa til svo harðra ráð­staf­ana þegar bólu­setn­ingar væru jafn útbreiddar og raun ber vitni hér á landi, lögðu þau áherslu á mik­il­vægi þess að vernda spít­al­ann og að horfa til vís­inda og stöð­unnar hverju sinni.

„Auðvitað er það sér­stakt en það er líka vitað að bólu­efnin sem við erum að nota eru ekki að veita full­komna vörn, sér­stak­lega gegn hinu nýja afbrigði,“ sagði Katrín Jak­obs­dóttir. Hún sagði að þrátt fyrir algengi Omíkron-afbrigð­is­ins og lægra inn­lagn­ar­hlut­fall hjá fólki sem smit­ast af því, væri enn tals­vert um smit af Delta-afbrigð­inu. Það gæti leitt til alvar­legri veik­inda og fleiri inn­lagna á sjúkra­hús.

Hinar nýju sótt­varn­ar­reglur taka gildi á mið­nætti og gilda, að öllu óbreyttu, fram til 2. febr­úar.