Útvarpsmaðurinn Sigurður Þorri Gunnarsson eða Siggi Gunnars eins og hann er kallaður, hefur nú verið ráðinn tónlistarstjóri Rásar 2.
Akureyringurinn Siggi Gunnars hefur undanfarin ár unnið sem tónlistar- og dagskrárstjóri útvarpsstöðvarinnar K100 en einnig var hann með Loga Bergmanni í Síðdegisþættinum á K100. Siggi tilkynnti ráðninguna í færslu á Facebook í dag en þar segir hann meðal annars að nú sé kominn tími á nýjar áskoranir á nýjum stað, eftir átta góð ár á K100. Segir hann nýja starfið vera sannkallað draumastarf þar sem hann fær tækifæri til að kynna helstu strauma og stefnur í tónlist sem og vinna með íslensku tónlistarfólki.
Hér er tilkynningin í öllu sínu veldi:
„Útvarp Reykjavík. Nú verðar sagðar fréttir.
Eftir tæp átta ár af krefjandi en dásamlega skemmtilegu uppbyggingarstarfi með frábæru fólki á K100 er kominn tími á nýjar áskoranir á nýjum stað. Sá staður er RÚV okkar allra þar sem ég mun fljótlega taka við starfi tónlistarstjóra Rásar 2.Litli-Siggi var bara sex ára þegar hann fékk að fylgjast með Gesti Einari að störfum á RÚVAK en þaðan sendi hann út þáttinn Hvíta máva að loknum hádegisfréttum. Eftir það var ekki aftur snúið, útvarpsbakterían var komin til að vera. Almannaútvarp hefur verið mér hugleikið lengi, en bæði BA ritgerðin mín og MA verkefnið mitt fjölluðu einmitt um hlutverk almannaútvarps og í meistaranáminu í Bretlandi lagði ég sérstaka áherslu á að kynna mér vel útvarpshluta BBC.Nema hvað, tuttugu og sjö árum eftir að hafa fylgst með Gesti Einari tala við þjóðina, hef ég störf á RÚV og verð einmitt í loftinu á sama tíma og fyrirmyndin var á árum áður – á milli kl. 12:40 og 14. Sannkallað draumastarf að koma að rekstri vinsælustu útvarpsstöðvar landsins, vinna með íslensku tónlistarfólki og fá tækifæri til að kynna helstu strauma og stefnur í tónlist. Magnað hvernig örlagadísirnar eiga það til að snúast á sveif með manni.Hjartans þakkir fyrir samstarfið kæru vinir í Hádegismóum! Við getum verið stolt og glöð af árangri síðustu ára. Mér þykja kveðjustundir alltaf erfiðar en á sama tíma er ég ótrúlega spenntur fyrir næstu verkefnum.RÚV – hér kem ég!“
Athugasemdir