Ungur sonur Mundu sá þegar hún skar mann á háls – „Öll ötuð blóði og með áverka á höfði“

Þann 25.októ­ber árið 1974 fór hinn 28 ára Jóhannes í heim­sókn til vin­konu sinnar, Mundu. Hún var búsett á Suð­ur­lands­braut í Reykja­vík ásamt ung­lings­syni sínum.

Jóhannes og Munda sátu ásamt 15 ára syni hennar og vini hans við drykkju. Ung­ling­arnir ætl­uðu á ball og yfir­gáfu húsið upp úr mið­nætti. Þeir komust þó ekki inn á ballið og sneru aftur heim um klukkan tvö.

Þegar þeir bönk­uðu á úti­dyrnar kom Munda til dyra. Hún hleypti drengj­unum inn en hljóp svo inn í svefn­her­bergi eftir að hafa gripið brauð­hníf úr eld­hús­inu. Sonur Mundu fór á eftir henni og kom þar að í þann mund sem hún skar Jóhannes á háls með hnífnum. Sonur hennar réðst á hana og náði að afvopna hana, kall­aði hann svo á vin sinn og bað hann um að hlaupa í næsta hús og hringja á lög­reglu. Það gekk hægt að finna síma og varð son­ur­inn óró­legur á bið­inni. Hann stökk þá út, braust inn í verslun og hringdi þar á lög­reglu og sjúkra­bíl. Þegar dreng­ur­inn sneri til baka var Jóhannes kom­inn inn í eld­hús, mjög mátt­far­inn. Verður sonur Mundu þá vitni að því þegar hún tekur upp skæri og vasa­hníf og stingur Jóhannes með hvoru tveggja. Sonur hennar réðst þá á hana, náði af henni vopn­unum og barði hana nokkrum sinnum.

Þegar lög­regla kom á vett­vang til­kynntu drengirnir að Munda væri inni í svefn­her­bergi.

„Sat konan þar á dýnu, á nær­buxum einum fata. Var hún öll ötuð blóði og með áverka á höfði og sár á læri. Var annað augað alveg sokkið og hitt mjög blóðugt. Var þegar kölluð til sjúkrabif­reið og konan flutt á slysa­deild Borg­ar­spftal­ans,“ sagði í frétt Morg­un­blaðs­ins eftir morðið.

Drengirnir tveir voru fluttir í fanga­geymslu lög­reglu en sleppt að loknum yfir­heyrslum. Sonur Mundu við­ur­kenndi að hafa veitt móður sinni áverka í til­raun til að stöðva hana. Munda við­ur­kenndi að hafa orðið Jóhann­esi að bana. Áverkar á líki hans voru þrír, langur skurður var á hálsi, þvert yfir bark­ann og aftur fyrir eyrun. Þá voru tvö stungu­sár á lík­inu, annað fyrir neðan við­bein og hitt á vinstri öxl. Munda við­ur­kenndi einnig að hafa áður ráð­ist á Jóhannes og stungið hann í hand­legg, hún hafði áður gerst tvisvar sek um að ráð­ast á fólk með egg­vopni og var þá talin geð­veik eftir rann­sókn.

Munda var talin ósak­hæf og dæmd í ótíma­bundna gæslu á stofnun. Hún gerð­ist þó sek um annað morð, þá á sam­býl­is­manni sínum, árið 1992.

Jóhannes var sjó­maður og bjó hjá for­eldrum sínum, hann var ókvæntur og barn­laus.