Kauphöllin rýnir í falska tilkynningu Festi: „Við erum með þetta í skoðun“

For­stjóri Kaup­hall­ar­innar segir í sam­tali við Við­skipta­blaðið að til­kynn­ing Festi um starfs­lok Eggerts Þórs Krist­ó­fers­sonar, for­stjóra félags­ins, sé til skoð­unar hjá Kaup­höll­inni.

Til­kynn­ingin vakti mikla athygli og hefur málið verið tölu­vert í deigl­unni und­an­farna daga. Í til­kynn­ing­unni var það full­yrt að Eggert hefði sjálfur sagt starfi sínu lausu. Samkvæmt heim­ildum á það þó ekki við rök að styðj­ast, heldur var honum sagt upp.

Talsverð ólga hefur verið meðal hlut­hafa og fjár­festa í félag­inu í kjöl­farið. Í dag var til að mynda greint frá því að hlut­hafar ræddu nú um það sín á milli að óska eftir hlut­hafa­fundi vegna máls­ins. Eggert Þór var að sögn afar vel lið­inn og orð­spor hans í starfi gott.

Eggert Þór Krist­ó­fers­son

Mynd: n1.is

Eftir að í ljós kom að Eggert hefði raunar ekki sagt upp sjálfur, vakti það undrun og reiði að stjórn félags­ins skyldi miðla slíkum upp­lýs­ingum til hlut­hafa sinna.

„Við erum með þetta í skoðun. Það er í raun og veru eins og með mörg önnur mál er varða upp­lýs­inga­skyldu skráðra félaga á mark­aði,“ segir Magnús Harð­ar­son, for­stjóri Kaup­hall­ar­innar, í sam­tali við Við­skipta­blaðið, aðspurður hvort til­kynn­ing Festi sé til skoð­unar þar.

Heim­ildir herma að skýr­ing­arnar sem Eggert Þór fékk á upp­sögn­inni hafi verið á þá leið að gera ætti breyt­ingar hjá félag­inu. Samkvæmt Við­skipta­blað­inu var honum einnig tjáð að sjö ár væri hæfi­legur tími í for­stjóra­stóli.

Samkvæmt heim­ildum Mannlífs hafði meiri­hluti stærstu hlut­hafa í Festi fyrst frétt af upp­sögn Eggerts Þórs þegar til­kynn­ingin barst Kaup­höll­inni. Í kjöl­far til­kynn­ing­ar­innar lækk­aði hluta­bréfa­verð fyr­ir­tæk­is­ins um 3,7 pró­sent.

Eggert hefur starfað hjá Festi og for­vera félags­ins í 11 ár. Í for­stjóra­tíð hans hefur Festi og fyr­ir­tæki sam­stæð­unnar skilað miklum hagn­aði. Ávöxtun hlut­hafa hefur verið með því hæsta sem sést hefur á Íslandi frá fjár­mála­hruni.