Kári gerði ólöglegt lag – Segir útvarpsstjóra til syndanna fyrir að spila það ekki

Kári Stef­áns­son, for­stjóri Íslenskrar erfða­grein­ingar, segir Stefán Eiríks­son útvarps­stjóra vera gungu fyrir að neita að spila ólög­lega útsetn­ingu á íslenska þjóð­söngnum í Rík­is­út­varp­inu. Kári segir þessa útsetn­ingu runna undan hans rifjum. Allt þetta kemur fram í aðsendri grein hans í Frétta­blað­inu þar sem hann lætur Stefán og RÚV hafa það óþvegið.

Kári segir þessa vafasömu útsetn­ingu vera eftir Þor­stein Einars­son gítar­leik­ara og Ey­þór Gunnars­son píanista. Hana má hlusta á hér. Kári seg­ist þó hafa óskað eftir lag­inu, og því nokk­urs konar höf­uð­paur máls­ins. Hann segir verkið inn­blásið af sam­bæri­legum útsetn­ingum bæði Stra­vins­ky og Jimmy Hendrix.  Hann lýsir aðdrag­anda þess svo:

„Það var svo um dag­inn að ég bað Þor­stein Einars­son gítar­leik­ara og Ey­þór Gunnars­son píanista að spila ís­lenska þjóð­söng­inn á þann máta að hann ætti erindi inn í þau augna­blik sem eru að líða akkúrat núna. Þeir fóru létt með það og tóku upp magn­aða út­gáfu sem er full af til­brigðum sem verða ein­ungis túlkuð sem gagn­rýni á af­skipta­leysi ís­lensks sam­fé­lags gagn­vart næstum öllu sem skiptir máli, kjörum þeirra sem minnst mega sín, barna­fá­tækt, græðgi þeirra sem mest eiga og tak­marka­lausum yfir­gangi út­gerðar­glæpon­anna.“

Kári seg­ist hafa hringt í Stefán útvarps­stjóra til að gauka lag­inu að honum. „Ekki fór á milli mála að það var skylda mín að koma flutn­ingi tví­menn­ing­anna á fram­færi og ég hringdi í Stefán nafna þinn Ei­ríks­son út­varps­stjóra og lagði til að hann léti spila þetta sem síð­asta lag fyrir fréttir á 17. júní. Ég sendi honum upp­tök­una og hann sagð­ist ætla að skoða málið.“

Svo komu smá­skila­boð frá Stefáni, en rétt er að geta þess að hann var áður lög­reglu­stjóri á höf­uð­borg­ar­svæð­inu: „Stöldrum strax við 3. gr. Laga um þjóð­söng­inn, þar sem segir að hann skuli ekki flytja eða birta í annarri mynd en hinni upp­runa­legu gerð. Setur okkur aug­ljós­lega skorður. Bkv. SE“.

Kári segir þessa afstöðu lýsandi fyrir hvernig komið er fyrir Rík­is­út­varp­inu. „Stjórn­völd eru búin að brjóta Ríkis­út­varpið niður að innan með því að fela stjórn stofn­un­ar­innar fólki sem lítur á hana sem vanda­mál þeirra sem vilja græða pen­inga á fjöl­miðlum, frekar en þann sam­nefn­ara þjóð­ar­innar sem hún var um ára­tugi. Þess vegna verður þjóðin að hlusta á þessa snilldar­út­setn­ingu á þjóð­söngnum alls staðar ann­ars staðar en í Ríkis­út­varp­inu, eins og YouTu­be og á einka­reknum út­varps- og sjón­varps­stöðum. Ég reikna með því að þú skiljir að með því erum við ekki að halda fram hjá Ríkis­út­varp­inu vegna þess að maður getur ekki haldið fram hjá þeim sem vill mann ekki.“

Að lokum segir Kári þá Þorstein og Eyþór best geymda á rétt­ar­geð­deild, enda glæpa­menn. „En síðan hitt, það er engin spurn­ing að Þor­steinn og Ey­þór brutu lög og eru þess vegna glæpa­menn. Það sem meira er, ég get borið vitni um að þeir iðr­ast einskis. Hið eina sem á eftir að gera er að á­kveða refs­ing­una en eitt er víst að það kemur ekki til greina að láta menn­ina ganga lausa og fremja alls konar ó­lög­lega tón­listar­gjörn­inga. Ég hvet þá sem á­kveða refs­ing­una að hafa eftir­far­andi í huga: Búið er að sýna fram á að það eru sterk tengsl milli sköp­unar­gáfu og geð­veiki. Fé­lag­arnir tveir, Þor­steinn og Ey­þór, eru snill­ingar að springa úr sköp­unar­mætti og eiga þess vegna ekki heima á Litla Hrauni heldur á réttar­geð­deild.“