Egill Helgason birtir færslu á Facebook-síðu sinni að sjálfur Egill Ólafsson hafi skrifað umsögn um plötu sonar hans, Kára.
„Kári Egilsson er ungur íslenskur músíkant, sem ég hef áður heyrt spila listavel á sitt djassaða klavier – en nýlega gaf hann út, á Spotify, nýja músík með eigin lögum og textum. Útgáfan nefnist „Palm Trees In The Snow“ en, þar kveður við annan og óvæntan tón.“
Egill segir að „hér birtist Kári ekki aðeins sem lagasmiður og textahöfundur, heldur einnig sem söngvari. Stíllinn á lögunum er stundum létt – poppaður, með hip hop hryni og á stundum má greina létt áhrif frá djassi og milli-músík.
Lagasmíðarnar eru margar hverjar mjög fínar og minna um sumt á eldri tónsmiði eins og; Jimmy Webb og Bacharach og á stundum má greina áhrif frá Gunnari Þórðarsyni. Þetta er sagt unga tónskáldinu til hróss – ekki ónýtt að fara í smiðju til snillinga og gera það vel og fallega.“
Egill nefnir að „þetta á til dæmis við um eitt af bestu lögum safnsins, að mínu mati; „Something Better“ Textar Kára, eru yfirleitt mjög fínir og engu líkara en þar fari mun eldri maður en Kári – en ungir menn taka út þroska með öðrum hætti í dag en mín kynslóð gerði og er það vel.“
Meistari Egill Ólafsson endar grein sína á þessum orðum:
„Þessi útgáfa sannar fyrir mér fjölbreytta hæfileika Kára, sem kunnáttumanns í lagasmíð og textagerð. Sem söngvari tekst honum ekki alltaf jafn vel upp, en hann á það til að „glissa“ eða renna sér full mikið upp og niður að og frá tónunum, fyrir minn smekk, eins og t.a.m. „Moonbeam“. Annað lætur honum betur að syngja; „Something Better“ er til dæmis vel sungið hjá Kára.
Áfram Kári – hér er að ferðinni lagasmiður sem vert er að gefa gaum. Um leið og ég mæli með því besta á „Palm Trees In The Snow“sem er vísbending um makalaust þroskað verklag – vil ég segja; til hamingju með þig Kári – áfram til stjarnanna! (í mars 2023 / egill ólafsson).“
Athugasemdir