Áslaug Arna Sigurbjörnsdóttir er klókur stjórnmálamaður. Hún upplýsti það í hlaðvarpsþættinum Chat after dark að Bjarni Benediktsson, formaður Sjálfstæðisflokksins hefði á sínum tíma tilkynnt sér að hún yrði ekki dómsmálaráðherra eftir afsögn Sigríðar Á. Andersen. Áslaug Arna upplýsir að hún hafi orðið fyrir vonbrigðum enda hafi hún ákveðið að sækjast eftir embættinu. Hún hringdi í föður sinn, Sigurbjörn Magnússon, stjórnarformann Árvakurs, og upplýsti hann um höfnunina. Hún hafði sent Bjarna sms með eftirfarandi setningu: „Ég hélt þú myndir þora“.
Þau undur og stórmerki urðu að eftir þetta skipti Bjarni um skoðun og gerði Áslaugu að ráðherra. Hún hafi pantað sér rauðvínsglas og mat og ætlaði að fylgjast með fundi þingflokks Sjálfstæðisflokksins á Teams þar sem tilkynnt yrði „hvaða kall“ yrði fyrir valinu. Þá hringdi Bjarni óvænt í Áslaugu Örnu. Hann var að tilkynna henni að hún yrði næsti dómsmálaráðherra.
Hermt er að Bjarni hefði verið búinn að ákveða að Brynjar Níelsson fengi dómsmálaráðuneytið. Brynjar hafði áður verið færður niður um sæti á lista flokksins í Reykjavík til að gefa Sigríði Andersen meira vægi sem leiddi til þess að hún varð fyrir valinu sem ráðherra. Næst var það svo þessi höfnun. Brynjar endaði með því að falla af þingi …
Athugasemdir